Amérika xitayning alyumin mehsulatlirini Uyghur mejburiy emgikige chétishliq bolghanliqi üchün qara tizimlikke alghan

Amérika hökümiti Uyghur mejburiy emgikige chétishliq bolghanliq gumani bilen xitayning alyumin mehsulatlirini chekleshke bashlighan.

“Blumbérg” torining bu heqtiki xewiride éytilishiche, amérika tamozhna we chégra qoghdash idarisi xitayda, bolupmu Uyghur élida yasalghan alyumin mehsulatlirini tutup qélish uqturushi tarqatqan bolup, u asasliq mashina zapchaslirida ishlitilidighan alyuminni nishan qilidiken.

Xitay tashqiy ishlar ministirliqi amérikaning qararini eyibligen. Xitay tashqi ishlar ministérliqining bayanatchisi mawning kündilik axbarat yighinida muxbirlarning bu heqtiki so'aligha jawab bergende: “Amérika shinjangda mewjut bolmighan irqiy qirghinchiliqni bahane qildi, soda mesilisini siyasiylashturup, teminlesh zenjirini muqimsizlashturdi” dégen.

Amérika hökümiti bultur 6-aydin bashlap “Uyghur mejburiy emgikining aldini élish qanuni” ni resmiy halda ishqa kirishtürgen we Uyghur mejburiy emgiki asasida ishlepchiqiriliwatqan paxta, pemidur we yérim ötküzgüch yasashta qollinilidighan polisilikon (polysilicon) qatarliqlarni chekligen idi.

“Blumbérg” torining muxbirliri bu heqte Uyghur élidiki alyumin yapraqchisi ishlepchiqiridighan “Shinjang dunyawiy birleshme shirkiti”, “Sherq ümid goruhi shirkiti” we “Tengritagh alyumin guruhi” shirketlirige télifon qilghan bolsimu, emma ulardin héchqandaq bir inkas alalmighan.