“амазон” ширкитиниң уйғур дияридики мәҗбурий әмгәккә четишлиқ икәнлики ашкариланди

Мухбиримиз әзиз
2022-03-07
Share

“дунядики әң чоң тор магизини” дәп тәриплиниватқан “амазон” ширкитиниң дуня миқясидики тәнқид вә әйибләш чуқанлириға қаримастин давамлиқ һалда уйғур дияридики мәҗбурий әмгәккә четишлиқ мәһсулатларни сетиш билән мәшғул болуватқанлиқи йеқинда техиму зор дәриҗидә ашкара болди.

7-Март күни “техника ашкарилиқи қурулуши” гурупписи елан қилған мәхсус доклатта ейтилишичә, “амазон” ширкитиниң ашкара тәминат зәнҗиридики бәш тәминләш нуқтисини мухбирлар вә тәтқиқатчилар “хитайдики мәҗбурий әмгәк билән бағлинишлиқи бар” дәп һөкүм чиқарған. Доклатта ейтилишичә, булар тәмин әткән мәһсулатлар “амазон” ширкитиниң тор суписида ашкара сетилған. Йәнә бир қисим содигәрләр болса уйғур дияридики пахта ишләпчиқиришиға четишлиқ мәҗбурий әмгәк мәһсулатлирини бу супида сатқан. Доклатта бу һәқтә ениқ қилип: “уйғур дияридики пахта мәһсулатлири америка һөкүмити елан қилған җазалаш тәдбирлиридә тилға елинған мәһсулатлардур. Әмди амазон ширкитиниң уйғурларни мәҗбурий әмгәккә селиш вә ‛ешинчә әмгәк күчини ишқа орунлаштуруш‚ намида завутларға ишчилиққа йөткәш қилмишини қанчилик паш қилиши бир чоң соал болуп қалмақта,” дейилгән.

Мәзкур доклат елан қилинғандин кейин, NBC агентлиқи амазон ширкити билән уйғурларни мәҗбурий әмгәккә сеиш қилмиши тоғрисида алақилашқан. Амазон ширкитиниң баянатчиси ерика рейносо (Erika Reynoso) бу һәқтә җаваб қайтуруп: “ширкитимиз кишилик һоқуқ дәпсәндичиликигә, җүмлидин мәҗбурий әмгәк мәсилисигә әстайидил муамилә қилиду. Бу хилдики қилмишниң дәлил-испатлири мәлум болған һаман биз тегишлик чарә қоллинип келиватимиз,” дегән.

Хитайниң америкадики баш әлчисиханиси бу доклатни “асассиз төһмәттин башқа нәрсә әмәс” дәп кәскин инкар қилған һәмдә “шинҗаңдики аз санлиқ милләтләрниң әмгәк қилиши пүтүнләй өз ихтиярилиқи бойичә болиду” дегән.

Канададики саймон фрайзер (Simon Fraser) университетиниң ярдәмчи профессори дәррен байлер (Darren Byler) болса бу һәқтә мухбирларға сөз қилип: “бу уйғур ишчиларниң әмгәк һәққидә қарар чиқириш һоқуқи йоқ. Бу ишлар пүтүнләй хитай дөлитиниң контроллуқида вә башқуришида болиду” дегән.

Һалбуки, доклатта баян қилинған хитай ширкәтлириниң үчи нәччә йүз уйғур ишчини ишләткәнлики паш болған завутларниң игиси болуп, ‍улар асаслиқи еликтир үскүнилирини һәмдә еликтиронлуқ үскүниләрниң ‍екранлирини ишләпчиқиридикән. Буларниң бәзилири уйғурларниң мәҗбурий әмгики һәққидики хәвәрләр паш болғандин кейин уйғур ишчиларни завутлардин “тазилиған” икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт