Америка һәрбий әмәлдари америкиниң җәнубий деңиздин чекинмәйдиғанлиқини билдүрди

Мухбиримиз җүмә
2017.08.26

Бир юқири дәриҗилик америка һәрбий әмәлдари америкиниң җәнубий деңиздин чекинмәйдиғанлиқи вә мәзкур деңиз районида әркин йүрүш қилишни давамлаштуридиғанлиқини билдүрди.

Униң бу сөзлири америкиниң бир қоғлиғучи һәрбий парахоти дүшәнбә күни җәнубий деңизда һадисигә учриғандин кейин оттуриға чиқти.

Дүшәнбә күни җәнубий деңизда йүрүватқан америкиниң җон меккейн намлиқ қоғлиғучи парахоти хитай өзиниң дәп, земин дәталиши қиливатқан деңиз тәвәликидә йүрүшни ахирлаштуруп қайтишида, сингапорниң бир май парахоти билән соқулуп кәткән.

Нәтиҗидә икки нәпәр америка әскири өлгән, 8 нәпириниң из-дерики болмиған иди.

Фирансийә агентлиқиниң хәвәр қилишичә, җүмә күни малайшияда мухбирларниң зияритини қобул қилған америка һава армийә генерали теренсе ошавнесй юқиридәк һадисиләргә қаримай америкиниң җәнубий деңизда һәрикәт қилишни давам қилидиғанлиқини билдүрди.

У, бу хилдики һадисиләрниң америкиниң деңизда әркин йүрүш оператсийәлиригә әкс тәсир көрсәтмәйдиғанлиқини ейтти.

Хәвәрдә нәқил қилишичә у мундақ деди: “мән бу хилдики һәрқандақ һадисиләр америка қошма штатлири өз қисимлириға тәминлигән тәңдашсиз қабилийәткә һәргизму қарар көләңгә ташлиялмайду, дәп қараймән.”

У йәнә америкиниң җәнубий деңиздики һәрбий һәрикәтлирини тохтатмайдиғанлиқини билдүрди.

У мундақ деди: “бизниң хәлқаралиқ қанун йол қойған һәрқандақ тәвәликкә парахот вә айропиланлиримизни әвәтиштә мәйданимиз мустәһкәм. Биз шундақ қилишни изчил давам қилимиз. Җәнубий деңиз вә униң әтрапида биз һәр күни һәрбий һәрикәт елип баримиз.”

Хитай җәнубий деңизниң мутләқ көп қисминиң өзигә тәвәликини илгири сүрүп, деңизниң бир қисим җайлириға сүний аралларни ясашни башлиғандин кейин, америкиму мәзкур деңидики һәрбий чарлашни күчәйткән.

Америка бу йил киргәндин буян хитай ясиған сүний аралларға йеқин җайларға бир нәччә қетим һәрбий парахот әвәткән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.