Amérika ana weten xewpsizliki ministirliqi yene 37 xitay shirkitini jazalaydighanliqini élan qildi
2025.01.14
Amérika ana weten xewpsizliki ministirliqi 14-yanwar küni axbarat élan qilip, yene 37 xitay shirkitini “Uyghur mejburiy emgikining aldini élish qanuni” boyiche jazalash tizimlikige kirgüzidighanliqini jakarlidi. Bu mezkur ministirliqning bügün'giche bir qétimdila köp sandiki xitay shirkitini jazalishi hésablinidiken.
Axbaratta déyilishiche, bu qétim qara tizimlikke qoshulghan xitay shirketliri Uyghur élidiki muhim kan bayliqlirini achidighan hem pishshiqlap ishleydighan dangliq shirketler, “Shinjang paxtisi” bilen toqumichiliq mehsulatliri ishlepchiqirip, pütün dunyagha éksport qilidighan shirketler, shundaqla küntaxtilargha ishlitilidighan kiristalliq kirimni ishlepchiqiridighan shirketlirini öz ichige alghan.
Axbaratta, bu 37 shirketning ismi toluq élan qilin'ghan bolup, ularning ichide “Xu'afu kiyim-kéchekliri shirkiti, dungxey küntaxta téxnika shirkiti, xungyüen yéshil énérgiye cheklik shirkiti” qatarliqlar dunyagha tonulghan shirketler iken. Yuqiriqi shirketler xitaydiki mejburiy emgek bilen chétishliq bolup, buning bilen “Uyghur mejburiy emgikining aldini élish qanuni” boyiche cheklen'gen shirketlerning sani 144 ke yetken.
Amérika ana weten xewpsizliki ministiri alihandro mayorkas bu heqte söz qilip: “‛Uyghur mejburiy emgikining aldini élish qanuni‚ boyiche cheklen'gen xitay shirketliri 150 ke yéqinlap qaldi. Mana bular, mejburiy emgek zorawanliqi bilen keskin küresh qiliwatqanliqimizni, kishilik hoquqni qoghdash wedimizni emelge ashuruwatqanliqimizni, shundaqla erkinlik we adil riqabetni qoghdawatqanliqimizni körsitidu” dégen.