Америка дөләт мәҗлиси әзаси американиң бирләшкән дөләтләр тәшкилати нопус фондиға пул бәрмәсликини тәләп қилған

Мухбиримиз җәвлан
2021-04-21
Share

"федератсийәчиләр" (The Federalist) торида елан қилинған бир мақалидә билдүрүлүшичә, җумһурийәтчиләрдин болған авам палата әзаси чип рой йеқинда америка дөләт мәҗлисигә бирләшкән дөләтләр тәшкилати нопус фондиға пул беришни чәкләш тоғрулуқ бир қанун лайиһәси сунған. Илгирики йилларда американиң мәзкур фондқа пул чиқирип ярдәм бериши талаш-тартиш қилинип келиватқан мәсилә болуп, буниң сәвәби бу фондниң хизмити мәҗбурий бала чүшүрүш вә туғмаслиқ оператсийәси ишлири билән мунасивәтлик икән. Хитай һөкүмити уйғурларниң нопусини азлитип ирқий қирғинчилиқ йүргүзүватқан вә америка һөкүмити буниңға қәтий қарши туруватқан вәзийәттә америка һәргиз бу фондқа иқтисадий ярдәм бәрмәслики керәк икән.

Мақалидә ейтилишичә, өткән йил трамп һөкүмити бирләшкән дөләтләр тәшкилати билән хитайниң һәмкарлиқи түпәйлидин нопус фондиға беридиған пулни тутуп қалған һәмдә һөкүмәт алмишишқа аз қалғанда хитайниң җинайитини "ирқий қирғинчилиқ" дәп җакарлиған. Әмма байден гәрчә кеңәш палата әзаси вақтида бу фондқа ярдәм беришни рәт қилип аваз бәргән болсиму, һөкүмәт рәһбирилик орниға чиққандин кейин бу фондқа ярдәм беришни әслигә кәлтүргән. Авам палата әзаси чип рой америкадики баҗ төлигүчиләрни кишилик һоқуқни дәпсәндә қилиш җинайитигә шерик қилмаслиқ үчүн, байден һөкүмитиниң бирләшкән дөләтләр тәшкилати нопус фондиға ярдәм беришни тохтитиши керәкликини тәкитлигән.

Җәместавун фондиниң доклатиға қариғанда, хитайниң туғмаслиқ оператсийәси үчүн хәҗләйдиған пули 200 миңдин көп оператсийәгә йетидикән. 2019-Йил б д т нопус фондиниң хитайға хәҗлигән пули 624 миң 204 долларға йәткән. Хитайниң сесиқ нами пур кәткән "пиланлиқ туғут сиясити" мәҗбурий бала чүшүрүш вә туғмаслиқ оператсийәси қилишни асас қилған болуп, дуня бойичә әң узун давамлашқан вә һелиһәм давамлишиватқан бу қәбиһ қилмиш 400 милйон нопусниң дуняға келишини чәклигән.

Мақалидә мундақ дейилгән: "хитай һөкүмитиниң уйғур вә башқа мусулманлар аялларниң балисини чүшүрүветиш вә туғдурмаслиқ оператсийәси қилиш шәклидә ирқий қирғинчилиқ йүргүзүши хәлқара җәмийәт тәрипидин күчлүк әйблиниши керәк вә хитай буниң ақивитини үстигә елиши керәк. Байдин һөкүмити бу қирғинчилиққа тақабил туримән дәйдикән, хитайниң уйғурларға зулум селишиға йол қоймаслиқи, васитилик шәкилдә болсиму ярдәм бәрмәслики керәк".

Омумән ейтқанда, мәзкур мақалидә бирләшкән дөләтләр тәшкилати нопус фонди хитайниң бу вәһший қилмиши вә ирқий қирғинчилиқ җинайитини билип туруп униң билән һәмкарлишишни давам қиливатқан әһвалда униңға ярдәм бериш униң җинайитигә шерик болғанлиқ дегән идийә илгири сүрүлгән вә америка һөкүмитиниң бу ярдәмдин ваз кечиши униң хитайниң уйғурларға қаратқан җинайитини "ирқий қирғинчилиқ" дәп җакарлиши билән оң танасип келидиғанлиқи оттуриға қоюлған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт