Amérika tashqi ishlar ministiri bilinkén aldimizdiki heptilerde xitayni ziyaret qilishi mumkin

Amérika tashqi ishlar ministiri antoniy bilinkénning aldimizdiki heptilerde xitayni ziyaret qilishni pilanlawatqanliqi bildürüldi. Amérika simliq xewerler tori CNN ning xewer qilishiche, ikki amérika hökümet emeldari we bu ishtin xewerdar menbelerdin biri, bilinkénning aldimizdiki heptilerning biride xitayda ziyarette bolushni pilanlawatqanliqidin uchur bergen. Mezkur xewer menbeliride bilinkénning béyjingni ziyaret qilishi üchün pilanlash xizmiti ishliniwatqanliqi bildürülgen. Bilinkénning xitayni ziyaret qilishi esli bu yil 2-aygha orunlashturulghan bolsimu, lékin xitay jasusluq sharining amérika hawa boshluqigha kirish weqesi bu ziyaretning kéchiktürülüshige seweb bolghanidi.

Bilinkénning xitayni ziyaret qilish pilani heqqidiki xewerler amérikaning sherqiy asiya-tinch okyan ishlirigha mes'ul yardemchi tashqi ishlar ministiri danéyal kritinbérg bilen amérika dölet xewpsizlik komitétining xitay we teywen ishliri aliy diréktori sarah béranning 4-iyun xitayni ziyaret qilip, xitay terep bilen “Semimiy” hem “Ünümlük” muzakire élip bérishining arqisidinla élan qilindi. Danéyal kriténbérg bilen sarah béranning ziyaritining 4-iyun” tyen'enmén qirghinchiliqi” ning 34 yilliq xatire künige toghra kélishi kishilik hoquq teshkilatlirining naraziliqigha uchrighanidi. S n n ning éytishiche, bilinkénning ziyariti ikki döletning zor bésimgha duch kelgen murekkep munasiwetliridiki muhim bir qedem hésablinidiken.

Amérika emeldarliri amérika-xitay riqabitining toqunushqa aylinip kétishining aldini élish üchün da'imliq bir alaqe qanili bolushi lazimliqini tekitlep kelgen. Bilinkénning ziyaritining qachan we qandaq mesililerge chétilidighanliqi éniq bolmisimu, lékin kishilik hoquq teshkilatliri uning ziyarette Uyghur “Irqiy qirghinchiliqi” ni toxtitish üchün küchlük pozitsiyede bolushini telep qilip keldi. Lékin s n n ning xewiride éytilishiche, amérika tashqi ishlar ministirliqining mu'awin bayanatchisi wédhnt patél, bilinkénning ziyaret pilani heqqide toxtilishni ret qilip: “Ministir üchün élan qilidighan bir sayahet pilani yoq” dégen.