Amérikaning b d t bash elchisi: Uyghurlar “Intayin azabliq” waqitlarni béshidin kechürmekte
2024.04.01
Amérikaning b d t da turushluq bash elchisi linda tomas grénféld xanim, ötken hepte b d t da sudanni öz ichige alghan afriqiliq musulmanlargha bergen iptarda, Uyghur musulmanliriningmu “Intayin azabliq” waqitlarni béshidin kechürüwatqanliqini tilgha alghan.
Linda tomas grénféldning bu agahlandurushi xitay hökümiti ereb elliridiki siyasiy partiyelerni, afriqa döletlirini, musulman eller we bezi tereqqiy qiliwatqan döletlerning diplomat, zhurnalist we ammiwi teshkilat wekillirini Uyghur diyarida pilanliq ziyaretke orunlashturup, dunyagha, bolupmu musulman dunyasigha Uyghurlarning “Yaxshi yashawatqanliqi”, diniy-étiqadigha “Hörmet qiliniwatqanliqi” ni körsitishke tirishiwatqan peytte otturigha qoyulghan.
Amérika tashqi ishlar ministirliqining torida bildürülüshiche, linda tomas grénféld 28-mart küni afriqiliq musulmanlargha bergen iptarliqtiki sözide mundaq dégen: “Biz herqaysi jaylardiki musulmanlar üchün hörmet we qayta yéngilinish éyi bolghan muqeddes ramizan éyida bir yerge jem bolmaqtimiz. Lékin bu ramizan éyi dunyaning her qaysi jayliridiki musulmanlar üchün, jümlidin afghanistan, süriye, shinjang, birma we ghezzediki musulmanlar üchün, shundaqla biz bügün sözini qiliwatqan sudan üchün intayin azabliq bir ramizan éyi bolmaqta.”
Linda tomas grénféldning qeyt qilishiche, nöwette “18 Milyon sudanliq bügünki ramizanning berikitide bir yerge jem bolush ornigha, ozuqluq yétishmeslikke duch kelmekte, balilar ach qalmaqta, xarab bolmaqta hem ölmekte” iken. Linda tomas grénféld 30-mart amérika ijtima'iy alaqe supisi X tiki uchuridimu, Uyghur diyarini öz ichige alghan bezi dölet we rayonlardiki “Milyonlighan a'ililerning roza tutup, iptar qilishi üchün tamaqsiz qéliwatqanliqi, du'a-tilawet qilishi üchün xatirjem bir jaygha érishelmeywatqanliqi we tayan'ghudek yéqinliriningmu yoqluqi” ni bildürgen. Xitay hökümiti we xitay hökümet taratqulirining Uyghur diyarida bu yilliq chaghan bayrimi, panus we tawuz chaghanlirini keng kölemlik teshwiq qilip, ramizan éyini tilghimu élip qoymighanliqi qeyt qilinmaqta.