Америка дөләт мудапиә министири: шималий корейә мәсилисини һәрбий күч билән һәл қилиш трагедийәлик

Мухбиримиз җүмә
2017-05-21
Share

Америка дөләт мудапиә министири җим маттис җүмә күни шималий корейә мәсилисини һәрбий күч билән һәл қилишиниң бәк трагедийәлик болидиғанлиқини билдүрди.

У, мухбирларға қилған сөзидә мундақ деди: "биз мәсилисини һәл қилиш үчүн изчил тиришимиз. Әгәрмәсилини һәрбий күч билән һәл қилиш йоли талланса, бу адәмниң әқлигә сиғмайдиған дәриҗидә трагедийәлик болиду."

У, нөвәттә вашингтон даирилириниң шималий корейә мәсилисини дипломатик йол билән һәл қилиш үчүн, бирләшкән дөләтләр тәшкилати, японийә, җәнубий корейә вә хитай қатарлиқ әлләр билән бирликтә ишләватқанлиқини ейтти.

У йәнә, шималий корейә өткән һәптә елип барған башқурулидиған бомба синақлириниң, униң хәлқара җәмийәтниң агаһландурушиға диққәт қилмайдиғанлиқини көрситидиғанлиқини алаһидә тилға алди.

Шималий корейә даирилири өткән йәкшәнбә күни оттура мусапилик башқурулидиған бомба синиқи елип барған. Синақниң нәтиҗилик болғанлиқи илгири сүрүлгән.

Һалбуки, шималий корейә апрелниң оттурилири елип барған бир қетимлиқ бомба синиқи мәғлубийәт билән аяғлашқан иди.

Шималий корейә башқурулидиған бомба синақлирини үзлүксиз давам қилғандин кейин, америка өзниң әң илғар башқурулидиған бомба қалқан системиси-THAAD йәни "юқири бошлуқ һава мудапиә терминали" ни җәнубий корейәгә орунлаштурған.

Хәвәрләргә қариғанда, америка йәнә өзиниң роналд реган намлиқ авиаматкисини пәйшәнбә күни японийә йокусука деңиз армийә базисидин җәнубий корейәдики һәрбий маневирға қатнишишқа йоллиған.

Униңдин башқа америка мәзкур манверға йәнә японийәдики ядро маторлуқ авиаматкисини йоллиған иди.

Әнглийә експрес гезитиниң хәвәр қилишичә, америкиниң карлс винсон намлиқ авиаматкиси җәнубий корейәгә йетип кәлгән һаман һәрбий маневирни башлайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт