Amérika dölet mudapi'e ministiri: shimaliy koréye mesilisini herbiy küch bilen hel qilish tragédiyelik

Amérika dölet mudapi'e ministiri jim mattis jüme küni shimaliy koréye mesilisini herbiy küch bilen hel qilishining bek tragédiyelik bolidighanliqini bildürdi.

U, muxbirlargha qilghan sözide mundaq dédi: “Biz mesilisini hel qilish üchün izchil tirishimiz. Egermesilini herbiy küch bilen hel qilish yoli tallansa, bu ademning eqlige sighmaydighan derijide tragédiyelik bolidu.”

U, nöwette washin'gton da'irilirining shimaliy koréye mesilisini diplomatik yol bilen hel qilish üchün, birleshken döletler teshkilati, yaponiye, jenubiy koréye we xitay qatarliq eller bilen birlikte ishlewatqanliqini éytti.

U yene, shimaliy koréye ötken hepte élip barghan bashqurulidighan bomba sinaqlirining, uning xelq'ara jem'iyetning agahlandurushigha diqqet qilmaydighanliqini körsitidighanliqini alahide tilgha aldi.

Shimaliy koréye da'iriliri ötken yekshenbe küni ottura musapilik bashqurulidighan bomba siniqi élip barghan. Sinaqning netijilik bolghanliqi ilgiri sürülgen.

Halbuki, shimaliy koréye aprélning otturiliri élip barghan bir qétimliq bomba siniqi meghlubiyet bilen ayaghlashqan idi.

Shimaliy koréye bashqurulidighan bomba sinaqlirini üzlüksiz dawam qilghandin kéyin, amérika özning eng ilghar bashqurulidighan bomba qalqan sistémisi-THAAD yeni “Yuqiri boshluq hawa mudapi'e términali” ni jenubiy koréyege orunlashturghan.

Xewerlerge qarighanda, amérika yene özining ronald régan namliq awi'amatkisini peyshenbe küni yaponiye yokusuka déngiz armiye bazisidin jenubiy koréyediki herbiy manéwirgha qatnishishqa yollighan.

Uningdin bashqa amérika mezkur manwérgha yene yaponiyediki yadro matorluq awi'amatkisini yollighan idi.

En'gliye éksprés gézitining xewer qilishiche, amérikining karls winson namliq awi'amatkisi jenubiy koréyege yétip kelgen haman herbiy manéwirni bashlaydiken.