Америка истанбулдики америка пуқралирини һези болушқа чақирди

Мухбиримиз җүмә
2017-06-17
Share

Америкиниң түркийәдә турушлуқ әлчиханиси җүмә күни кәчқурун баянат елан қилип, истанбулда елинған бихәтәрлик тәдбири түпәйли мәзкур шәһәрдики америка пуқралирини өз аманлиқиға һези болушқа чақирған. Баянатта мундақ көрситилгән: "бир террор тәһдитигә җавабән, түркийә хәвпсизлик даирилири истанбулниң мәҗидийәкой райони, болупму сисли агаоғлу кочисида күчлүк бихәтәрлик тәдбири алди."


Улар баянатида, бу районда йүз бериш еһтималлиқи болған бихәтәрлик тәһдитлири һәққидә конкретини мәлумати йоқлуқини билдүргән, әмма шундақтиму америка пуқралирини илгири чиқирилған бихәтәрлик агаһландурушиниң роһи бойичә иш көрүп, һошяр болушқа, әтрапидики муһитини обдан көзитип, көп адәм топлашқан җайларға бармаслиққа чақирған. Баянатта йәнә америка пуқралири чәтәлликләр көп баридиған ресторан, сода мәркәзлири ибадәт орунлири вә қатнаш мәркәзлиридин узрақ туруш һәққидә агаһландурулған. 

Һалбуки, түркийә ташқи ишлар министирлиқи шәнбә күни буниңға инкас қайтуруп, америка һөкүмитиниң бу агаһландурушни конкретни истихбарат учуриға тайинип әмәс, бәлки түркийә хәвпсизлик күчлири алған нормал бихәтәрлик тәдбиригә асасән чиқарғанлиқини билдүргән вә хәвпсизлик тәдбирлириниң террорлуқ тәһдити сәвәбидин елинғанлиқини рәт қилған. 

2017-Йиллиқ йеңи йил һарписи истанбулдики асасән чәтәлликләр баридиған рейна кулуби террорлуқ һуҗумиға учрап, 39 адәм өлтүрүлгән, 70 тәк адәм яриландурулған. Түркийәдики америка әлчиханиси шундин етибарән өз пуқралириниң саяһәт хәвпсизликигә алақидар көп қетим агаһландуруш елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт