Amérika istanbuldiki amérika puqralirini hézi bolushqa chaqirdi

Amérikining türkiyede turushluq elchixanisi jüme küni kechqurun bayanat élan qilip, istanbulda élin'ghan bixeterlik tedbiri tüpeyli mezkur sheherdiki amérika puqralirini öz amanliqigha hézi bolushqa chaqirghan. Bayanatta mundaq körsitilgen: “Bir térror tehditige jawaben, türkiye xewpsizlik da'iriliri istanbulning mejidiyekoy rayoni, bolupmu sisli aga'oghlu kochisida küchlük bixeterlik tedbiri aldi.”

Ular bayanatida, bu rayonda yüz bérish éhtimalliqi bolghan bixeterlik tehditliri heqqide konkrétini melumati yoqluqini bildürgen, emma shundaqtimu amérika puqralirini ilgiri chiqirilghan bixeterlik agahlandurushining rohi boyiche ish körüp, hoshyar bolushqa, etrapidiki muhitini obdan közitip, köp adem toplashqan jaylargha barmasliqqa chaqirghan. Bayanatta yene amérika puqraliri chet'ellikler köp baridighan réstoran, soda merkezliri ibadet orunliri we qatnash merkezliridin uzraq turush heqqide agahlandurulghan. 

Halbuki, türkiye tashqi ishlar ministirliqi shenbe küni buninggha inkas qayturup, amérika hökümitining bu agahlandurushni konkrétni istixbarat uchurigha tayinip emes, belki türkiye xewpsizlik küchliri alghan normal bixeterlik tedbirige asasen chiqarghanliqini bildürgen we xewpsizlik tedbirlirining térrorluq tehditi sewebidin élin'ghanliqini ret qilghan. 

2017-Yilliq yéngi yil harpisi istanbuldiki asasen chet'ellikler baridighan réyna kulubi térrorluq hujumigha uchrap, 39 adem öltürülgen, 70 tek adem yarilandurulghan. Türkiyediki amérika elchixanisi shundin étibaren öz puqralirining sayahet xewpsizlikige alaqidar köp qétim agahlandurush élan qilghan idi.