Amérika bilen kanada xitay bilen rusiyening bombardimanchi ayropilanlirini tosuwalghan

7-Ayning 24-küni, xitay bilen rusiyening bombardimanchi ayropilanliri amérikaning alyaska hawa boshluqigha yéqinlashqanda, amérika bilen kanada küreshchi ayropilanliri ularni tosuwalghan.

25-Iyul amérikaning “Töpilik” (The Hill) xewer torida bérilgen melumatqa qarighanda, shimaliy amérika hawa mudapi'e qomandanliq ishtabi (NORAD) 24-iyul küni bu heqte uchur bérip, amérikaning alyaska ishtati hawa boshluqi da'irisige yéqinlashqan rusiyening ikki bombardimanchi ayropilani bilen xitayning ikki bombardimanchi ayropilanini bayqap iz qoghlighanliqi hemde ularni tosuwalghanliqini bildürgen. Qomandanliq ishtabining qeyt qilishiche, bu bombardimanchi ayropilanlar amérika bilen kanadaning hawa boshluqigha kirmey, peqet xelq'ara hawa boshluqida heriket qilghan, shunga buni amérika bilen kanadagha sélin'ghan tehdit dep qarashqimu bolmaydiken. Emma xitay bilen rusiyening amérikagha qarshi ittipaqliqi we riqabetlirini nezerde tutqanda, ularning heriketlirini dawamliq közitish kérek iken.

Amérika dölet mudapi'e ministirliqi yéqinda shimaliy qutup rayoni istratégiyesini élan qilghan bolup, uningda xitay bilen rusiyening shimaliy qutup rayonidimu hemkarliqni kücheytiwatqanliqi, uninggha taqabil turush kérekliki otturigha qoyulghanidi. Uningda bérilgen melumatta, yer shari kilimatining issishi, shimaliy qutuptiki muzlarning érishi netijiside, tinch okyan bilen atlantik okyan boyidiki chong iqtisadiy gewdilerni bir-birige tutashturidighan déngiz yoli échilishqa bashlighanliqi, xitay bilen rusiyening buningda ortaq menpe'eti barliqi körsitilgenidi.

Rusiye bilen xitayning bombardimanchi ayropilanlirini tosushqa bu qétim kanadaning küreshchi ayropilanlirimu qatnashqan bolup, shimaliy amérika hawa mudapi'e qomandanliq ishtabi buningdin kéyin kélidighan xewpke qarshi birleshme hawa mudapi'e sépini téximu mustehkemlimekchi iken.