Amérika awam palatasi xitayning küntaxta mehsulatlirini cheklesh qanun layihesini maqullighan

 Amérika awam palatasi 28-april küni bilet tashlap, xitayning Uyghur mejburiy emgiki bilen zich baghlinishliq, dep qarilip kelgen küntaxta mehsulatlirini cheklesh toghrisidiki bir qanun layihesini maqullighan.

Melum bolushiche, mezkur qanun layihesi xitay küntaxta mehsulatlirining 3-dölet arqiliq amérikagha ékisport qilinishigha cheklime qoyidiken. Jumhuriyetchi kéngesh palata ezasi rik skot 28-april élan qilghan bayanatida, palata ezasi bil pozéy teripidin sunulghan partiyeler halqighan qanun layihesi “Xitay kompartiyesining amérika soda qanunini buzushi, ularning bu mehsulatlarni ishlepchiqirishta qul emgiki we balilar emgikini ishletkenlikini jawabkarliqqa tartidighanliqi” ni bildürgen.

En'gliye shéféld hallam uniwérsitétining hélénna kénnédi tetqiqat merkizi ötken yili élan qilghan doklatida, xitay küntaxta mehsulatlirining Uyghur mejburiy emgikige zich baghlinishliq ikenliki, küntaxta xam eshyasi ishlepchiqiridighan xitay shirketlirining xitayning Uyghurlargha qaritilghan “Namratliqtin qutquzush” namidiki mejburi emgek programmisigha aktip qatnashqanliqini bildürgen idi.

Kéngesh palata ezasi rik skotning éytishiche, “Dölet mejlisining qayta qarap chiqish qanuni” namliq bu qanun layihesi, xitay küntaxta ishlepchiqarghuchilirining mehsulatlirini 3-dölet arqiliq amérikagha kirgüzüp, amérika tamozhna béjidin atlap ötüshini tosuydiken, shundaqla amérika soda ministirliqining buninggha yol qoyudighan hazirqi mewjut qa'ide-tüzümini bikar qilidiken.

Melum bolushiche, rik skotmu kéngesh palatasida buninggha ‍oxshash bir qanun layihesini otturigha qoyghan. U bu heqtiki bayanatida: “Men awam palatasining pozéy yétekchilik qilghan bu qanun layihesini maqullighanliqidin xursenmen. Emdi <Uyghur kishilik hoquq qurulushi> ning qollishidiki bu qanun layihesining  kéngesh palatasida her ikki partiyening qollishi bilen mutleq köp awazda maqullinishigha ümidwarmen” dégen.