Америка мәбләғ башқуруш ширкәтлири барғансери хитайни мәбләғ селишқа болмайдиған дөләт дәп қаримақта

Вашингтондин мухбиримиз уйғар тәйярлиди
2024.03.20

Америкидики “төпилик” (THE Hill) гезитиниң 19-март күнидики мақалисигә асасланғанда, вал кочисидики (вал-ситрит) мәбләғ башқуруш ширкәтлири барғансери хитайни мәбләғ селишқа болмайдиған дөләт қарайдиғанлиқини илгири сүргән.

Мәзкур хәвәрдә дейилишичә, вал кочисидики мәбләғ башқуруш ширкәтлири ши җинпиң рәһбәрликидики компартийәниң мав зедуң дәвридикигә охшаш бир адәмниңла ағзиға қарайдиған мустәбит һакимийәт дәвригә қайтип кәлгәнлики үчүн бу қарарға кәлгән.

Мәбләғ салғучилар хитайниң пай базириниң сағламлиқиға, техиму кәң мәнидин ейтқанда, хитайдики хусусий ширкәтләрниң узун муддәт мәвҗут болуп турушиға гуман билән қарайдикән.

Хоңкоң университетидики чен җиву “пул-муамилә вақит гезити” гә мундақ дегән: “хитайда һечқандақ чоң ширкәт хоҗайиниға кәңчилик қилинмайду. Ши җинпиң уларниң мутләқ итаәт қилишни тәләп қилиду. Бу, заманиви пул-муамилә системиси билән сиғишалмайду. Хитайдики коммунизм билән заманивилиқ бир-биригә арилашмаслиқи керәк” .

Мәбләғ салғучиларниң хитай базиридин мәбләғ чекиндүрүши әҗәблинәрлик әмәс икән. “билумберг” ториниң хәвиригә қариғанда, чәтәллик мәбләғ салғучиларниң хитайдики мәблиғиниң пай қиммити 2023-йилиму төвәнлигән.

Йеқинда америка сода министири җина раймондо (Gina Raymondo) америка ширкәтлириниң һазир хитайни мәбләғ салғили болмайдиған дөләткә айлинип қалди дәп қарайдиғанлиқини, чүнки хитай һөкүмитиниң чәт әл ширкәтлиригә тохтимай җәриманә қойидиғанлиқи, тосаттин бесип кирип бихәтәрлик тәкшүрүши қилидиғанлиқини, шуңа бу ширкәтләр пурсәт издәп башқа дөләтләргә, башқа җайларға йүзлиниватқанлиқини билдүргәниди.  

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.