Хитай американиң һәрбий қораллириға аит лайиһиләрни оғрилиғанлиқини рәт қилди

Чаршәнбә күни америкада чиқидиған вашингтон почтиси гезити америка мудапиә тәтқиқатлири мунбириниң доклатини нәқил кәлтүрүп туруп хитай хаккирлириниң американиң бир қисим һәрбий қораллириниң лайиһисини қолға чүшүргәнликини билдүрди.

Униңда ейтилишичә, хитай хаккирлар қолға чүшүргән бу лайиһиләр американиң авиаматка вә һәрбий парахотлири, башқурулидиған бомбидин мудапиәлиниш системисиниң лайиһилириниму өз ичигә алидикән.

Әмма бүгүн, хитай мудапиә министирлиқиниң баянатчиси гең яңшиң буниңға рәддийә берип “доклатта һәм америка мудапиә министирлиқиниң хәвпсизлик системиси, һәм хитай хәлқиниң иҗадчанлиқи нәзәрдин сақит қилинған ” деди.

Интернет бихәтәрлики мәсилиси нөвәттә американиң хитай билән болған мунасивәтлиридики муһим мәсилиләрниң бири. Америка хитайға бесим ишлитип, америкиға қаратқан тор җасуслуқ һуҗумлирини тохтитишини тәләп қилмақта. Чаршәнбә күни ақсарайдин берилгән баянаттиму америка президенти барак обама билән хитай дөләт рәиси ши җинпиңниң келәр һәптә калифорнийидә елип берилидиған учришишниң әң муһим темисиниң, шүбһисизки интернет бихәтәрлики мәсилиси болидиғанлиқи қайта тәкитләнди.