Америка мухбириниң уйғурлар һәққидики гумани мәсхиригә көмүлди

Мухбиримиз әзиз
2021-12-28
Share

Йеқинда америкадики даңлиқ хәвәр агентлиқлиридин бири болған MSNBC телевизийәсиниң мухбири кайл гриффин өзиниң тиветтер бетидә йоллиған уйғурлар һәққидики учур кәң америка җамаитиниң мәсхирисигә көмүп ташланди.

“хәвәрләр һәптилики” гезитиниң 27-декабирдики хәвиридә ейтилишичә, мухбир кайл гриффин 26-декабир күни өзиниң тивиттер бетидә японийә һөкүмитиниң уйғур дияридики кишилик һоқуқ дәпсәндичилики сәвәбидин бейҗиң қишлиқ олимпик мусабиқисигә бармаслиқни қарар қилғанлиқи тоғрисидики хәвәрни һәмбәһирлигән. У бу хәвәрниң бешиға “японийә өзиниң юқири дәриҗилик әмәлдарлирини бейҗиң олимпик мусабиқисигә әвәтмәйдиған болди. Сәвәби улар америка һөкүмитиниң хитайдики аталмиш кишилик һоқуқ дәпсәндичилики түпәйлидин олимпик мусабиқисини байқут қилғанлиқиға аваз қошмақчи” дәп язған.

Униң “америка нөвәттә хитай һөкүмитини кишилик һоқуқ дәпсәндичилики қиливатиду, дәп ойлап қалған” дегән мәзмундики бу учури шу һаманла тивиттер қолланғучиларниң мәсхирисигә көмүлүп кәткән. Бәзиләр униңға хитай компартийәсиниң канийи болмаслиқ тоғрисида нәсиһәт қилған болса йәнә бәзиләр “MSNBC телевизийәси бейҗиң қишлиқ олимпик мусабиқисини нәқ мәйдандин тарқитидиғанлиқи үчүн кайл гриффин хитай һөкүмитигә чапанчилиқ қилған” дәп язған.

Америка мәркизий ахбарат идариси (CIA) ниң сиясий анализчиси гейл хелт бу учурға җаваб қайтуруп “сиз әң яхшиси ‛аталмиш‚ дегән сөзниң орниға ‛яхши һөҗҗәтләштүрүлгән‚ яки ‛һәммигә мәлумлуқ‚ дегән сөзни ишләткән болсиңиз ақиланилик болар иди. Чүнки бу сөзиңиз лагерлардики милйонларчә уйғурни, шуниңдәк хитай компартийәсииниң қолида җан үзгән сансизлиған уйғурни инкар қилғанлиққа баравәр” дәп язған.

Мәлум болушичә, америка башчилиқидики бир қисим ғәрб дөләтлири хитай һөкүмитиниң уйғурларни бастуруш һәрикитини “ирқий қирғинчилиқ” дәп җакарлиған һәмдә бәзи җаза чарилирини елан қилғандин кейин, болупму лондондики уйғур сот коллегийәси уйғур қирғинчилиқи һәққидики ахирқи сот һөкүмини елан қилғандин кейин хитай һөкүмити бар күчи билән буни инкар қилишқа тиришип кәлмәктә икән. Улар бу җәрянда әң көп тәкрарлиған баянларниң бири “бу пүтүнләй америка һөкүмити тоқуп чиққан ялғанчилиқ” дегән мәзмун болғанлиқи мәлум. Әмдиликтә буниң америка мухбириниң еғзидин чиқиши һәмдә буниң мәсхиригә көмүлүши нөвәттики һәқиқәтни яқлаш һәмдә уни сундуруш оттурисидики бир мәйдан тор күришини җанлиқ тәсвирләп бәрди, дәп қаралмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт