Amérika muxbirining Uyghurlar heqqidiki gumani mesxirige kömüldi

Muxbirimiz eziz
2021-12-28
Share

Yéqinda amérikadiki dangliq xewer agéntliqliridin biri bolghan MSNBC téléwiziyesining muxbiri kayl griffin özining tiwéttér bétide yollighan Uyghurlar heqqidiki uchur keng amérika jama'itining mesxirisige kömüp tashlandi.

“Xewerler heptiliki” gézitining 27-dékabirdiki xewiride éytilishiche, muxbir kayl griffin 26-dékabir küni özining tiwittér bétide yaponiye hökümitining Uyghur diyaridiki kishilik hoquq depsendichiliki sewebidin béyjing qishliq olimpik musabiqisige barmasliqni qarar qilghanliqi toghrisidiki xewerni hembehirligen. U bu xewerning béshigha “Yaponiye özining yuqiri derijilik emeldarlirini béyjing olimpik musabiqisige ewetmeydighan boldi. Sewebi ular amérika hökümitining xitaydiki atalmish kishilik hoquq depsendichiliki tüpeylidin olimpik musabiqisini bayqut qilghanliqigha awaz qoshmaqchi” dep yazghan.

Uning “Amérika nöwette xitay hökümitini kishilik hoquq depsendichiliki qiliwatidu, dep oylap qalghan” dégen mezmundiki bu uchuri shu hamanla tiwittér qollan'ghuchilarning mesxirisige kömülüp ketken. Beziler uninggha xitay kompartiyesining kaniyi bolmasliq toghrisida nesihet qilghan bolsa yene beziler “MSNBC Téléwiziyesi béyjing qishliq olimpik musabiqisini neq meydandin tarqitidighanliqi üchün kayl griffin xitay hökümitige chapanchiliq qilghan” dep yazghan.

Amérika merkiziy axbarat idarisi (CIA) ning siyasiy analizchisi géyl xélt bu uchurgha jawab qayturup “Siz eng yaxshisi ‛atalmish‚ dégen sözning ornigha ‛yaxshi höjjetleshtürülgen‚ yaki ‛hemmige melumluq‚ dégen sözni ishletken bolsingiz aqilanilik bolar idi. Chünki bu sözingiz lagérlardiki milyonlarche Uyghurni, shuningdek xitay kompartiyesi'ining qolida jan üzgen sansizlighan Uyghurni inkar qilghanliqqa barawer” dep yazghan.

Melum bolushiche, amérika bashchiliqidiki bir qisim gherb döletliri xitay hökümitining Uyghurlarni basturush herikitini “Irqiy qirghinchiliq” dep jakarlighan hemde bezi jaza charilirini élan qilghandin kéyin, bolupmu londondiki Uyghur sot kollégiyesi Uyghur qirghinchiliqi heqqidiki axirqi sot hökümini élan qilghandin kéyin xitay hökümiti bar küchi bilen buni inkar qilishqa tiriship kelmekte iken. Ular bu jeryanda eng köp tekrarlighan bayanlarning biri “Bu pütünley amérika hökümiti toqup chiqqan yalghanchiliq” dégen mezmun bolghanliqi melum. Emdilikte buning amérika muxbirining éghzidin chiqishi hemde buning mesxirige kömülüshi nöwettiki heqiqetni yaqlash hemde uni sundurush otturisidiki bir meydan tor kürishini janliq teswirlep berdi, dep qaralmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet