Американиң стратегийәлик нефит записини хитайға сетишни чәкләйдиған қанун лайиһәси тонуштурулди

Америка кеңәш палата әзаси тед круз (Ted Cruz) американиң стратегийәлик нефит записидики нефитни хитай вә униң ширкәтлиригә сетишни тохтитидиған бир қанун лайиһәсини тонуштурған.

“фокс” хәвәрлиригә қариғанда, кеңәш палата әзаси крузниң “американиң истратегийәлик нефит записини хитайға сетишни чәкләш қануни”ниң авам палатаси нусхаси йеқинда 97 гә қарши 331 аваз билән мақулланған болуп, у авам палатадики 113 нәпәр демократчи әзаниңму қоллишиға еришкән. Шуңа бу қанунниң кеңәш палата нусхасиниң мақуллинишидинму үмид зор икән.

Хәвәргә қариғанда, русийәниң украинаға қозғиған таҗавузчилиқ урушидин кейин, нефит баһасида шиддәт билән өрләш көрүлгән. Байдин һөкүмити американиң нефит записдин айрим – айрим һалда 30 милйон бак вә 180 милйон бак қоюп беришни елан қилған. Нәтиҗидә хитай контроллуқидики ширкәтләр дунядики әң чоң нефит записиға игә болушиға қаримай, ким артуқ қилип сетишта американиң икки милйон бак нефитини сетивалған икән.

Сенатор тед круз баянатида мундақ дегән: “америка истратегийәлик нефит записи (U.S. Strategic Petroleum Reserve) Американиң җиддий әһвалларда йетәрлик нефит записиға капаләтлик қилишни мәқсәт қилған. Биз американиң енергийәсини қоғдаш үчүн дәрһал һәрикәт қоллинишимиз керәк.”

Мәлум болушичә, әгәр кеңәш палата әзаси тед крузниң қанун лайиһәси мақулланса, американиң хам нефитини хитай компартийәси контроллуқидики һәр қандақ ширкәткә сетиш һәмдә хитайға һәр қандақ хам нефит експорт қилиш чәклинидикән.