Amérikaning stratégiyelik néfit zapisini xitaygha sétishni chekleydighan qanun layihesi tonushturuldi

Amérika kéngesh palata ezasi téd kruz (Ted Cruz) amérikaning stratégiyelik néfit zapisidiki néfitni xitay we uning shirketlirige sétishni toxtitidighan bir qanun layihesini tonushturghan.

“Foks” xewerlirige qarighanda, kéngesh palata ezasi kruzning “Amérikaning istratégiyelik néfit zapisini xitaygha sétishni cheklesh qanuni”ning awam palatasi nusxasi yéqinda 97 ge qarshi 331 awaz bilen maqullan'ghan bolup, u awam palatadiki 113 neper démokratchi ezaningmu qollishigha érishken. Shunga bu qanunning kéngesh palata nusxasining maqullinishidinmu ümid zor iken.

Xewerge qarighanda, rusiyening ukra'inagha qozghighan tajawuzchiliq urushidin kéyin, néfit bahasida shiddet bilen örlesh körülgen. Baydin hökümiti amérikaning néfit zapisdin ayrim – ayrim halda 30 milyon bak we 180 milyon bak qoyup bérishni élan qilghan. Netijide xitay kontrolluqidiki shirketler dunyadiki eng chong néfit zapisigha ige bolushigha qarimay, kim artuq qilip sétishta amérikaning ikki milyon bak néfitini sétiwalghan iken.

Sénator téd kruz bayanatida mundaq dégen: “Amérika istratégiyelik néfit zapisi (U.S. Strategic Petroleum Reserve) Amérikaning jiddiy ehwallarda yéterlik néfit zapisigha kapaletlik qilishni meqset qilghan. Biz amérikaning énérgiyesini qoghdash üchün derhal heriket qollinishimiz kérek.”

Melum bolushiche, eger kéngesh palata ezasi téd kruzning qanun layihesi maqullansa, amérikaning xam néfitini xitay kompartiyesi kontrolluqidiki her qandaq shirketke sétish hemde xitaygha her qandaq xam néfit éksport qilish cheklinidiken.