Америкаға қачақ кәлгән хитай пуқралири кәндирликтә қул әмгикигә селинған

Йеқинқи йиллардин бери американиң җәнубий чеграсидин қачақ йоллар билән келиватқан хитай пуқралири көпийип кәткән болуп, улар америкаға кәлгәндин кейин, җан беқиш үчүн хитайлар ачқан кәндирликтә қулдәк ишләшкә мәҗбурланған.

24-Июн, “америка аммиви радийоси” (NPR) ниң бу һәқтә бәргән хәвиридә ейтилишичә, өткән йили американиң йеңи мексика иштатида ечилған кәндирликтә нәччә онлиған хитай пуқрасиниң қулдәк ишләватқанлиқи байқалған, улар җәнубий каролина иштатидин бу йәргә йөткәп келингән болуп, бу йәрдин айрилишқа йол қоюлмиған, иш һәққиму берилмигән. Улар сақчиларни көрүп қорқуп кәткән.

Хәвәрдин мәлум болушичә, мушундақ хитай пуқралири американиң кәндир териш вә нәшә чекиш қанунлуқ болған иштатлиридики кәндирликтә ишлимәктикән. Уларниң хоҗайинлири асасән хитай болуп, ковид тарқалған мәзгилдә кәндир терип, нәшә сетип пул тепиш үчүн көпләп хитайларни яллап ишләткән. Бу хитайларниң паспорти вә янфони тартивелинған, ятақ, тамиқи берилгән, күнигә 15 саәт ишлитилгән. 

Америка чегра мудапиәси орниниң ашкарилишичә, 2023-йили американиң җәнубий чеграсидин қанунсиз киргән хитай пуқралири 37 миңға йәткән болуп, өткән 10 йилда киргәнләрниң санидинму көп икән.

Хәвәрдә ейтилишичә, кәндир терип нәшә елиш һазир америкадики чоң кәсипкә айланған болуп, уни қанунлуқ қилған иштатларниң көпийишигә әгишип, униң билән җан бақидиған хитайлар көпәйгән. Һалбуки, фәнтилин қатарлиқ зәһәрлик буюмларни контрол қилишта хитай билән мурәссәлишишкә мәҗбур болған американиң, нәшә терип сетишни қанунлуқ қилиши хитай үчүн америка җәмийитигә сиңип киридиған йәнә бир пурсәт яритип бәрмәктикән.