Бир қисим америка ширкәтлириниң хитайға салған мәблиғи тәкшүрүшкә елинған

Вашингтондин мухбиримиз ирадә тәйярлиди
2023.07.20

 Америкиниң бир түркүм мәбләғ селиш ширкәтлири америка дөләт мәҗлиси тәрипидин тәкшүрүшкә елинған.

“вал-ситрет журнили” ниң 20-июлдики хәвиридин қариғанда, дөләт мәҗлиси қармиқидики америка-хитай истратегийәлик риқабәт пәвқуладдә комитети йеқинда америкиниң “GGV Capital”, “GSR Ventures”, “Walden International” вә “Qualcomm Ventures” қатарлиқ ширкәтләрниң йерим өткүзгүч, сүний идрак вә кивант техникиси билән шуғуллинидиған хитай ширкәтлиригә салған мәбләғлирини тәкшүрүшкә алған.

Комитетниң ейтишичә, америка мәбләғ салған бу хитай ширкәтлири америкиниң дөләт бихәтәрликигә тәһдит селиватқан вә кишилик һоқуқ дәпсәндичиликигә четилған ширкәтләр икән. Америка ширкәтлириниң уларға мәбләғ селиши дегәнлик, хитайниң кишилик һоқуқ дәпсәндичиликини, хитайниң һәрбий җәһәттин заманивилишишини вә униң америкиниң техника җәһәттики үстүнлүкини тартивелиш тиришчанлиқини қоллиғанлиқ һесаблинидикән.

“вал ситрет журнили” ниң дейишичә, бу комитет нөвәттә америка ширкәтлириниң хитайниң өз мәқсәтлирини ишқа ашурушта ойнаватқан ролини тәкшүрүш хизмитини күчәйткән болуп, бу өз нөвитидә америка һөкүмити вә дөләт мәҗлисиниң хитай һәққидики көз қаришида көрүлүватқан өзгиришни намаян қилидикән.

Һазир йәнә, америка кеңәш палатаси америкиниң мудапиә сиясити қанун лайиһәсигә түзитиш киргүзүшни музакирә қиливатқан болуп, униңда америкилиқ мәбләғ салғучиларниң хитай вә башқа дүшмән дөләтләрдики бәзи ширкәтләргә салған мәблиғини мәлум қилиши тәләп қилинидикән. Байдин һөкүмити болса бир қисим һалқилиқ саһәләргә мәбләғ селишни тәкшүрүш тоғрисидиму мәмурий буйруқ чиқириш үчүн хизмәт қилмақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.