Америка сода министири америка ширкәтлириниң хитайға мәбләғ селишни халимайватқанлиқини билдүргән

Американиң әң чоң сода-иқтисад хәвәр қанили болған CNBC ториниң 29-авғуст күни хәвәр қилишичә, хитайни зиярәт қиливатқан америка сода министири җина раймондо (Gina Raymondo) бейҗиңдин шаңхәйгә баридиған тез пойизда мухбирларниң соалиға җаваб берип, америка ширкәтлириниң һазир хитайни мәбләғ салғили болмайдиған дөләткә айлинип қалди дәп қарайдиғанлиқини, чүнки хитай һөкүмитиниң чәт әл ширкәтлиригә тохтимай җәриманә қойидиғанлиқи, тосаттин бесип кирип бихәтәрлик тәкшүрүши қилидиғанлиқини билдүргән.

Җина раймондо мундақ дегән: “мән америка карханичилириниң ‛хитай һазир мәбләғ селишқа мас кәлмәйдиған дөләт, чүнки униң хәтири чоң‚ дегәнлирини барғансери көп аңлаватимән. Шуңа бу карханилар пурсәт издәп башқа дөләтләргә, башқа җайларға йүзлиниватиду” .

Җина раймондониң билдүрүшичә, хитай һөкүмити бу йилниң бешида микро өзәк (чип) ясайдиған америка ширкити микрон (Micron) технологийәси ширкитиниң мәһсулатлирини һеч сәвәбсизла чәкләп қойған; шундақла бу ширкәттин пайдилинип, американиң юқири техникилиқ мәһсулатларни експорт қилишни чәкләш қанунини рәт қилишқа урунған.

Америка-хитай риқабити алаһидә комитети рәиси майк галигер америка “фокс хәвәрлири” қанилида җина раймондониң хитай зияритигә инкас билдүрүп мундақ дегән: “җина раймондо ханим хитай хаккерлири униң елхәтлиригә һуҗум қилғанлиқи ашкара болғандин кейин хитайға барди. Немишқа у бир нәрсиси оғриланғандин кейин уни издәшкә бариду? бу пәқәт ‛зади немәңни хитайға ашкарилап қойдуң? ‚ дәп сораш мәсилиси әмәс. Немишқа бизниң барлиқ әмәлдарлимиз хитайға барса ялған сөзләйду? мәйли билинкен, җон кәрри, яки җенит йелин болсун, һәммиси хитайдин қуруқ қол йенип кәлгәндин кейин хитай техиму һәддидин ешишқа башлиди” .

28-Авғуст күнидин башлап хитайда зиярәттә болуватқан җина раймонд хитай тәрәп билән “сода ишлири хизмәт гурупписи” қуруш һәққидә музакириләшкән һәмдә сода-иқтисадий мунасивәттә хитайдин “айрилиш” нийитиниң йоқлуқини билдүргәниди.