Amérika soda ministiri amérika shirketlirining xitaygha meblegh sélishni xalimaywatqanliqini bildürgen

Amérikaning eng chong soda-iqtisad xewer qanili bolghan CNBC torining 29-awghust küni xewer qilishiche, xitayni ziyaret qiliwatqan amérika soda ministiri jina raymondo (Gina Raymondo) béyjingdin shangxeyge baridighan téz poyizda muxbirlarning so'aligha jawab bérip, amérika shirketlirining hazir xitayni meblegh salghili bolmaydighan döletke aylinip qaldi dep qaraydighanliqini, chünki xitay hökümitining chet el shirketlirige toxtimay jerimane qoyidighanliqi, tosattin bésip kirip bixeterlik tekshürüshi qilidighanliqini bildürgen.

Jina raymondo mundaq dégen: “Men amérika karxanichilirining ‛xitay hazir meblegh sélishqa mas kelmeydighan dölet, chünki uning xetiri chong‚ dégenlirini barghanséri köp anglawatimen. Shunga bu karxanilar purset izdep bashqa döletlerge, bashqa jaylargha yüzliniwatidu” .

Jina raymondoning bildürüshiche, xitay hökümiti bu yilning béshida mikro özek (chip) yasaydighan amérika shirkiti mikron (Micron) téxnologiyesi shirkitining mehsulatlirini héch sewebsizla cheklep qoyghan؛ shundaqla bu shirkettin paydilinip, amérikaning yuqiri téxnikiliq mehsulatlarni éksport qilishni cheklesh qanunini ret qilishqa urun'ghan.

Amérika-xitay riqabiti alahide komitéti re'isi mayk galigér amérika “Foks xewerliri” qanilida jina raymondoning xitay ziyaritige inkas bildürüp mundaq dégen: “Jina raymondo xanim xitay xakkérliri uning élxetlirige hujum qilghanliqi ashkara bolghandin kéyin xitaygha bardi. Némishqa u bir nersisi oghrilan'ghandin kéyin uni izdeshke baridu? bu peqet ‛zadi némengni xitaygha ashkarilap qoydung? ‚ dep sorash mesilisi emes. Némishqa bizning barliq emeldarlimiz xitaygha barsa yalghan sözleydu? meyli bilinkén, jon kerri, yaki jénit yélin bolsun, hemmisi xitaydin quruq qol yénip kelgendin kéyin xitay téximu heddidin éshishqa bashlidi” .

28-Awghust künidin bashlap xitayda ziyarette boluwatqan jina raymond xitay terep bilen “Soda ishliri xizmet guruppisi” qurush heqqide muzakirileshken hemde soda-iqtisadiy munasiwette xitaydin “Ayrilish” niyitining yoqluqini bildürgenidi.