Amérika tamozhna we chégra idarisining bashliqi: “Shinjang import mehsulatlirining cheklinishi körünerlik yaxshi bashlinish boldi”

Amérika tamozhna we chégra qoghdash idarisining komissari kris magnus, amérikaning bu yil 6-aydin bashlap resmiy yolgha qoyulghan “Uyghur mejburiy emgikining aldini élish qanuni”ning ‍ijra qilinish ehwali heqqide toxtilip, “Shinjang import mehsulatlirining cheklinishi körünerlik yaxshi bashlinish bolghanliqi”ni bildürgen. U yene shirketlerning bu qanun'gha emel qilishigha ishench bilen qaraydighanliqidin signal bergen. “Blumbérg xewerliri” agéntliqining bildürüshiche, krist magnus: “Ijra'at jeryanida bezi qiyinchiliqlar bolidu. Biraq, méningche biz körünerlik yaxshi bir bashlinish qilduq, dep qaraymen” dégen.

Krist magnus bu sözlerni 21-öktebir küni “Blumbérég xewerliri” agéntliqining ziyaritini qobul qilghanda éytqan. Xitayning Uyghur mejburiy emgikige xatime bérishni meqset qilghan we ötken yili 12-ayda prézidnét baydén teripidin testiqlinip, bu yil 6-aydin bashlap resmiy ijra qilinishqa bashlighan bu qanun, amérika -xitay soda munasiwitini qayta shekillandüridu, dep qaralghan idi. “Blumbérg xewerliri”ning körsitishiche, krist magnus amérika dölet mejlisining her ikki palatasida birdek awaz bilen maqullan'ghan bu qanun, amérika xelqining qollishigha érishkenlikini tekitligen.

U mundaq dégen: “Axiriqi hésabta bu amérika xelqining buni xalash-xalimasliqigha baghliq. Bu mesilide xelqning chüshenchisi zor derijide yükseldi… xelq mejburi'i ‍emgekte ishlepchiqirilmighan mehsulatlarni  sétiwélishni isteydu.”

Krist magnus bu qanunni ‍ijra qilishta “Körünerlik yaxshi bashlinish bolghanliqi”ni bildürgen bolsimu, biraq kishilik hoquq teshkilatliri amérika tamozhna we chégra qoghdash idarisining soda sanliq melumatida téximu ochuq -ashkara bolushini telep qilmaqta.

Melum bolushiche, 21-öktebir küni amérika yéshil tinchliq teshkilati, kishilik hoquqni közitish teshkilati, amérika Uyghur jem'iyiti, dunya Uyghur qurultiyi qatarliq 40 tek teshkilat krist magnusqa xet yézip, soda paraxotliridiki mallarning sanliq melumatini ochuq-ashkara élan qilish “Uyghur mejburiy emgikining aldini élish qanuni”ni ünümlük ijra qilish üchün intayin muhim ikenlikini tekitligen.