Американиң таможна санлиқ мәлумати уйғур тәминләш зәнҗириниң мурәккәпликини көрситип бәргән

Америка чегра қоғдаш вә таможна идарисиниң “уйғур мәҗбурий әмгикиниң алдини елиш қануни” ни иҗра қилиш әһвалиға даир йеңи санлиқ мәлуматлири уйғур тәминләш зәнҗириниң мурәккәпликини, униңға четишлиқ мәһсулатларниң хитайдин әмәс, башқа дөләтләрдин келиватқанлиқини көрситип бәргән. “екеологийәлик тоқумичилиқ хәвәрлири” намлиқ тор гезитиниң ашкарилишичә, йеңи санлиқ мәлуматлар америка таможнаси йеқинқи 12 ай ичидә уйғур мәҗбурий әмгикигә четишлиқ, дәп тутуп қалған импорт мәһсулатлириниң көпинчисиниң биваситә хитайдин әмәс, шәрқий-җәнубий асиядики башқа дөләтләрдин кәлгәнликини ашкарилап бәргән.

Америка чегра қоғдаш вә таможна идариси йеқинда 2022-йили 6-айниң ахирлиридин башлап иҗра қилинишқа башлиған “уйғур мәҗбурий әмгикиниң алдини елиш қануни” ниң бир йиллиқи мунасивити билән йеңи таможна санлиқ мәлуматлирини елан қилған. Йеңи санлиқ мәлуматлардин ашкарилинишичә, уйғур мәҗбурий әмгикигә четишлиқ, дәп қаралған яки гуман қилинған мәһсулатлар әң көп малайсиядин, униңдин қалса вийетнамдин кирмәктә икән. Американиң таможна санлиқ мәлуматида, хитайдин биваситә киргән бу хил мәһсулатларниң миқдар җәһәттин 3-орунда туридиғанлиқи, тайланд вә мексиканиң 4- вә 5-орунда туридиғанлиқи көрситилгән.

Америка мәҗбурий әмгәк хизмәт әтритиниң 1-авғуст елан қилған “уйғур мәҗбурий әмгикиниң алдини елиш қануни” ни иҗра қилиш истиратегийәсигә даир мәлуматида көрситишичә, америка таможнаси бу қанунға асасән дәсләпки бир йилда қиммити бир милярд 300 милйон долларлиқ 4000 дин артуқ йолланмини көздин кәчүргән. Шуниң билән бир вақитта, америка сода министирлиқи уйғур мәҗбурий әмгикигә четишлиқ икки хитай ширкитини қара тизимликкә киргүзгән. Америка сода вәкили катерин тай 1-авғуст елан қилған бу һәқтики баянатида, “бу, американиң мәҗбурий әмгәкни чәкләштики тәврәнмәс вәдиси намаян қилиду” дегән.