Amérikaning tamozhna sanliq melumati Uyghur teminlesh zenjirining murekkeplikini körsitip bergen

Washin'gtondin muxbirimiz erkin teyyarlidi
2023.08.03

Amérika chégra qoghdash we tamozhna idarisining “Uyghur mejburiy emgikining aldini élish qanuni” ni ijra qilish ehwaligha da'ir yéngi sanliq melumatliri Uyghur teminlesh zenjirining murekkeplikini, uninggha chétishliq mehsulatlarning xitaydin emes, bashqa döletlerdin kéliwatqanliqini körsitip bergen. “Éké'ologiyelik toqumichiliq xewerliri” namliq tor gézitining ashkarilishiche, yéngi sanliq melumatlar amérika tamozhnasi yéqinqi 12 ay ichide Uyghur mejburiy emgikige chétishliq, dep tutup qalghan import mehsulatlirining köpinchisining biwasite xitaydin emes, sherqiy-jenubiy asiyadiki bashqa döletlerdin kelgenlikini ashkarilap bergen.

Amérika chégra qoghdash we tamozhna idarisi yéqinda 2022-yili 6-ayning axirliridin bashlap ijra qilinishqa bashlighan “Uyghur mejburiy emgikining aldini élish qanuni” ning bir yilliqi munasiwiti bilen yéngi tamozhna sanliq melumatlirini élan qilghan. Yéngi sanliq melumatlardin ashkarilinishiche, Uyghur mejburiy emgikige chétishliq, dep qaralghan yaki guman qilin'ghan mehsulatlar eng köp malaysiyadin, uningdin qalsa wiyétnamdin kirmekte iken. Amérikaning tamozhna sanliq melumatida, xitaydin biwasite kirgen bu xil mehsulatlarning miqdar jehettin 3-orunda turidighanliqi, tayland we méksikaning 4- we 5-orunda turidighanliqi körsitilgen.

Amérika mejburiy emgek xizmet etritining 1-awghust élan qilghan “Uyghur mejburiy emgikining aldini élish qanuni” ni ijra qilish istiratégiyesige da'ir melumatida körsitishiche, amérika tamozhnasi bu qanun'gha asasen deslepki bir yilda qimmiti bir milyard 300 milyon dollarliq 4000 din artuq yollanmini közdin kechürgen. Shuning bilen bir waqitta, amérika soda ministirliqi Uyghur mejburiy emgikige chétishliq ikki xitay shirkitini qara tizimlikke kirgüzgen. Amérika soda wekili katérin tay 1-awghust élan qilghan bu heqtiki bayanatida, “Bu, amérikaning mejburiy emgekni chekleshtiki tewrenmes wedisi namayan qilidu” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.