Amérika tamozhnisida tutup qélin'ghan mejburiy emgek tawarlirining istatistikisi élan qilindi

Washin'gtondin muxbirimiz eziz teyyarlidi
2023.09.27

Amérika tamozhna we chégra qoghdash idarisi (CBP) 2022-yili iyunda “Uyghur mejburiy emgikining aldini élish qanuni” ijra qilin'ghandin bashlap 2023-yili awghustqiche bolghan mezgilde özliri musadire qilghan hemde Uyghur diyaridiki mejburiy emgek bilen alaqidar, dep guman qilghan tawarlarning tizimlikini élan qildi.

Ularning tor bétide bérilgen bayanatta éytilishiche, “Uyghur mejburiy emgikini aldini élish qanuni” Uyghur diyarida ishlen'gen herqandaq tawarning mejburiy emgektin xaliy bolushi lazimliqini qanun jehettin muqimlashturghan. Ularmu del mushu mejburiyet tüpeylidin aldinqi yilidin bashlap bu sahede eng zor tirishchanliq körsetken hemde 2300 qétimdin köprek mal yollanmisini musadire qilghan. Bu ularning tekshürüshidin ötken tawar yollanmisining yérimigha yéqin kélidiken.

Istatistikida körsitilishiche, amérika tamozhnisigha mal sélishta eng köp salmaqni igileydighan dölet malaysiya, andin qalsa wiyétnam iken. Xitay bu jehette üchinchi orunda bolup, ular yollighan tawarlarning qimmiti 240 milyon amérika dolliri bolghan. Halbuki, ötken birnechche yilda xitayning mejburiy emgek bilen ishlen'gen mehsulatlarni üchinchi bir döletke yötkep, bu jayda orap qachilighandin kéyin gherb bazirigha éksport qilishi heqqidiki xewerler köplep otturigha chiqqan idi.

Istatistikidin melum bolushiche, amérika tamozhnisidin ötken tawarlar ichide éléktironluq buyumlar, kiyim-kéchek we ayagh mehsulatliri, yéza igilik mehsulatliri eng köp salmaqni teshkil qilghan. Amérika tamozhna we chégra qoghdash idarisining komissarliridin érik choy (Eric Choy) bu heqte radiyomizning ziyaritini qobul qilghanda “Biz tekshüridighan tawarlarning miqdari xizmet qabiliyitimizdin zor derijide éship kétiwatqanliqi üchün Uyghur mejburiy emgikige chétishliq hemmila tawarni tekshürüp chiqishqa ajizliq qiliwatimiz” dégenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.