Amérika hökümiti teywen'ge qoral sétip bérishni testiqlidi
2017.06.30
Amérika dölet ishliri ministirliqi peyshenbe küni teywen'ge bir milyard 400 milyon dollarliq qoral-yaraq sétip bérishni testiqlighan. Amérika dölet ishliri ministirliqi bayanatchisi hézir né'urtning bildürüshiche, tramp hökümiti peyshenbe küni amérika dölet mejlisige qoral sétish qararini uqturghan.
Né'urt, muxbirlargha bergen bayanatida, “Bu, teywenning öz-özini ünümlük mudapi'e qilishigha bolghan qollishimizni körsitidu” dégen. Birleshme agéntliqining ashkarilishiche, teywen'ge sétip bérilidighan qorallar torpédo, aldin'ala signal béridighan téxnikiliq eswablar, anti-radi'aktipliq bashqurulidighan bomba qatarliq qorallarni öz ichige alghan.
Biraq, tramp hökümitining qarari xitayning qattiq naraziliqini qozghidi. Xitay tashqi ishlar ministiri lu kang, amérikining qarari xitayning igilik hoquqi, bixeterlik menpe'etige éghir buzghunchiliq qilidighanliqini bildürüp, bu, amérikining “Bir xitay siyasiti” ge xilap ikenlikini ilgiri sürgen.
Lu kang jüme küni “Héchkim bizning zémin pütünlükimizni, igilik hoquqimizni qoghdash iradimizdin qayturalmaydighanliqini tekitleymiz” dégen. Amérikining qarari xitayning qarshiliqigha uchrighan bolsimu, biraq teywen dölet mudapi'e ministirliqi jüme küni amérikining qararidin “Semimiy minnetdar” bolghanliqini élan qildi. Amérikining teywen'ge qoral sétish qarari xitay re'isi shi jinping xongkonggha yétip barghan küni élan qilin'ghan. Uningdin bir kün burun amérika kéngesh palatasi qanun maqullap, amérika herbiy paraxotlirining teywende toxtap ötüshige ruxset qilghan idi.