Америка қитәләр ара учидиған башқурулидиған бомбиларни тосуш синиқи елип бариду

Мухбиримиз җүмә
2017-05-27
Share

Америка һәрбий даирилири келәр һәптә бир қитәләр ара учидиған башқурулидиған бомбиларни тосуш синиқи елип баридикән.

Америка дөләт мудапиә министирлики қармиқидики башқурулидиған бомба мудапиә идарисиниң җүмә күни билдүрүшичә, синақ келәр сәйшәнбә күнигә орунлаштурулған.

Мәлум болушичә, синақ калифорнийә штатиға җайлашқан вандәнберг һава армийә базиси вә америкиниң маршал тақим араллириға җайлашқан кваҗалейн атол һава армийә базисида елип берилидикән.

Қитәләр ара учидиған башқурулидиған бомбиға тәқлид қилинған модел бомба кваҗалейн атол һава армийә базисидин америкиға қаритип етилғандин кейин, бу хилдики бомбиларни пачақлиғучи бомба калифорнийә вандәнберг һава армийә базисидин қоюп берилидикән.

Әгәр синақ пилан бойичә маңса пачақлиғучи бомба америкиға қарап етилған бомбини тинч окян һава бошлуқида тосуп пачақлап ташлайдикән.

Бирләшмә агентлиқида нәқил қилишичә, америка дөләт мудапиә министирлиқи башқурулидиған бомба мудапиә идарисиниң баянатчиси кристофер җонсон қитәләр ара учидиған башқурулидиған бомбиға тәқлид қилип ясалған бомбиниң әсли бомбиға қариғанда тезрәк учидиғанлиқини билдүргән.

Кристофер җонсон тәқлидий бомбиниң шималий корейәниң бомбилириға тәқлид қилинмиғанлиқини алаһидә әскәрткән болсиму, мәзкур бомба қалқан системиси синиқиниң шималий корейә башқурулидиған бомба техникисини барғанчә илғарлаштуриватқан мәзгилгә тоғра кәлгәнлики диққәт қозғиған.

Шималий корейә бу ай ичидила икки қетим оттура мусапилик башқурулидиған бомба синиқи елип барған.

Синақниң нәтиҗилик болғанлиқи илгири сүрүлгән болсиму, әмма бу һәқтә тохталған җәнубий корейә даирилири бу бомбиларниң америкиниң гуам арилидики һәрбий әслиһәлиригә зәрбә бәргүдәк йираққа баралмайдиғанлиқини билдүрүшкән.

Бу һәптә шималий корейәниң башқурулидиған бомба техникиси һәққидә тохталған америка дөләт мудапиә министирлики разведка бөлүминиң директори лейтенант генерал винсент стеварт тәдбир елинмиған тәқдирдә ким җуңунниң башқурулидиған бомба синақлирида ғәлибә қазинип кетиши мумкинликини билдүргән иди.

Мәлуматларға қариғанда, америкиниң калифорнийәдин, һавай арилиғичә болған 36 орунда башқурулидиған бомба тосуш әслиһәлири бар икән.

Америка 1999-йилидин буян башқурулидиған бомбиларни тосуп пачақлайдиған қалқан системилирини синақ қилишқа башлиған. Буниң ахирқи қетимқиси 2014-йили елип берилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт