Amérika tinch okyandiki döletler ara alaqini kücheytmekte

 Amérikaning hindi-tinch okyan rayonidiki tesir küchini ashurush tirishchanliqi küchiyiwatqan bolup, pirézidént jow baydinning aldimizdiki hepte yeni 8-ayning 18-küni üch terep bashliqlar yighini üchün yaponiye we koréye dölet rehberlirini kütüwélishi buning yarqin ipadisi hésablinidiken.

Melum bolushiche, bu uchrishishta pirézidént jow baydin yaponiye bash weziri fumi'o kishida (Fumio Kishida) we koréye pirézidénti yon suk yé'ol (Yoon Suk Yeol) bilen körüshidiken. Ular sherqiy jenubiy asiya elliri ittipaqi we hindi-tinch okyan rayonidiki döletler ara alaqini kücheytish we dunyawi xirislargha ortaq taqabil turush qatarliq mesililer heqqide söhbetlishidiken.

Amérika déngiz armiyesi quruqluqta jeng qilghuchi qismining pénsiyege chiqqan léyténanti sam mundi imzasida “Herbiy waqit géziti” de élan qilin'ghan mulahize maqaliside körsitilishiche, ukra'ina urushi shérik we ittipaqdash döletlerning hemkarliqining qaysi derijide muhimliqini körsitip bergen. Del mushu sewebtin amérika nöwette tinch okyan rayonidiki döletler bilen bolghan hemkarliqini ashurushni közlimektiken.

Aptorning qarishiche, “Shimaliy atlantik ehdi teshkilati (NATO) gha eza bolmighan döletler hemkarliq tori” ni qaytidin kücheytishmu muhim tallashlardin biri bolup, bu hal amérikaning bu hemkarliq tori ichidiki döletler bilen bolghan herbiy, pen-téxnika we bashqa muhim sahelerdiki almashturushni kücheytidiken.