Amérika hökümiti tinch okyan döletliri rehberlirini aqsaraygha jem qilmaqchi

Roytérs agéntliqining 2-maydiki xewiride éytilishiche, tinch okyan boyidiki döletler bilen bolghan diplomatik alaqini kücheytish üchün baydin hökümiti yéqinda bu döletlerning rehberlirini aqsaraygha jem qilip, bir qétimliq hemkarliq muzakirisi ötküzidiken. Aqsarayning hindi-tinch okyan ishlirigha mes'ul xadimlardin kurt kampbél (Kurt Campbell) bu heqte toxtilip: “Amérika hökümiti bu qétimqi yighilish arqiliq tinch okyan döletliri bilen bolghan diplomatik munasiwetni yene bir baldaq yuquri sewiyige kötürmekchi,” dégen.

Xewerde éytilishiche, tinch okyan mesilisi amérika hökümiti üchün bekmu zor qimmetke ige istratégiyelik mesile bolup, nöwette amérika hökümiti bu rayon'gha da'ir türlük qurulushlarni tézlitish üchün ghayet zor meblegh hel qilishqa tereddut qilmaqta iken. Bu mesile heqqide amérika hazir yéngi zélandiye, awstraliye, yaponiye, en'gliye we fransiye qatarliq döletler bilen zich hemkarliq ornatmaqta iken.

Melum bolushiche, yéqinqi mezgillerde xitay hökümitining tinch okyan rayonidiki déngiz tewelikini talishi'ish ghelwisi éship méngiwatqan bolup, bu jehette ular aliqachan bezi emeliy qedemlerni alghan. Shuningdek herbiy bazilarni qurush we ijarige élishta aktip pa'aliyet qilmaqta iken. Nöwette bir qisim analizchilar her ikki terepning özige yarisha herbiy teyyarliqta ikenlikini eskertiwatqan bolup, ikki terep otturisidiki herbiy toqunush mumkinchiliki heqqidimu bezi texminler otturigha chiqmaqta iken.