Amérikaning tewekkül meblighi shirketlirining xitay shirketlirige meblegh sélishining Uyghur qirghinchiliqidiki roli qayta tekitlendi

Amérika dölet mejlisi qarmiqidiki “Amérika-xitay riqabiti alahide komitéti” xitay hökümitining Uyghurlargha yürgüzüwatqan irqiy qirghinchiliqigha ortaq bolup kelgen xitay shirketlirige meblegh séliwatqan amérika shirketlirini tenqidligen.

“Amérika-xitay riqabiti alahide komitéti” X tiki hésabida élan qilghan uchurida, “Ötken 20 yil mabeynide amérikaning tewekkül meblighi shirketliri xitay kompartiyesining Uyghurlargha irqiy qirghinchiliq yürgüzüshige shara'it yaritip bergen xitay shirketlirige nechche yüz milyon meblegh saldi” déyilgen.

Mezkur komitétning bildürüshiche, séku'aya kapital, waldin xelq'ara shirkiti, ku'alkam hessidarliq shirkiti, GSR hessidarliq shirkiti, GGV kapital qatarliq shirketler xitayning Uyghurlarni keng kölemde nazaret qilishigha yardem qilghan sün'iy eqilni tereqqiy qildurush shirkiti Megvii, chiray tonush téxnikisini tereqqiy qildurghan hemde Uyghur élidiki saqchi organliri bilen hemkarlashqan SenseTime, DeepGlint qatarliq xitay shirketlirige meblegh salghan.

Bu yilning béshida, “Amérika-xitay riqabiti alahide komitéti” köp yillardin buyan xitay armiyesini tereqqiy qildurush we Uyghurlarni basturushqa chétishliq xitay shirketlirige meblegh séliwatqan amérikaliq tewekkül meblighi shirketliri heqqide 68 betlik bir doklat élan qilghanidi. Doklatta ular, amérikaning 5 tewekkül meblighi shirkitining xitayning irqiy qirghinchiliqi we bashqa kishilik hoquq depsendichilikige yardem bériwatqan yuqiri téxnika shirketlirige az dégende 3 milyard dollar meblegh salghanliqini bildürgen.

Amérika dölet mejlisning bu mesilini kötürüp chiqishi netijiside, amérikaning meblighini amérikaning menpe'etige ziyan sélish üchün tirishiwatqan xitay shirketlirige, bolupmu xitayning dölet hamiyliqidiki shirketlerge salmasliq heqqide nurghun munaziriler qozghalghan we bir qisim shirketler xitay baziridin chékinishke bashlighanidi.