Америкидики уйғур җамаити йеңи йилни биргә күтүвалди

Мухбиримиз үмидвар
2017.01.01


12-Айниң 31-күни америка уйғурлири бирләшмисиниң тәшкиллиши билән пайтәхт вашингтон шәһири йенидики фаллс чурч райониға җайлашқан бир меһманханиниң залида уйғурлар бир йәргә җәм болуп, йеңи йилни күтүвелиш паалийити өткүзди.

Вашингтон шәһири йенидики виргинийә, мариланд штатлири вә башқа җайлардин кәлгән бир қисим уйғурлар, йәни балилар вә яшларни өз ичигә алған 200 дин адәм бир ариға җәм болуп, өз миллий нахша-музикилири, миллий таамлири вә әнәнилиридин һузурланған һалда кона 2016-йилини узутуп, йеңи 2017-йилини күтүвалған.

Мурасим башлиниш билән дуня уйғур қурултийиниң рәиси рабийә қадир ханим йеңи йиллиқ нутуқ сөзләп, паалийәткә қатнашқанлар вә пүтүн уйғур хәлқиниң йеңи йилини тәбриклиди шуниңдәк 2017-йилиниң уйғурлар үчүн зор нәтиҗиләр қолға кәлгән бир йил болушини тилиди.

Паалийәткә америка уйғурлири бирләшмисиниң рәиси илшат һәсән қатарлиқ риясәтчилик қилған болуп, паалийәт җәрянида уйғур яшлири өзлири тәйярлап кәлгән һәр хил сәнәт номурлири вә башқа программилар орундалди.

Мәлумки, америка уйғурлири бирләшмиси қурулғандин буян һәр йили вашингтон әтрапидики уйғур муһаҗирлирини бир ариға җәм қилип, йеңи йил, қурбан һейт, норуз вә җумһурийәт паалийәтлирини өткүзүп кәлмәктә.

Йеқинқи бир қанчә йил ичидә америкидики, җүмлидин вашингтон шәһири әтрапидики уйғурларниң саниниң тез көпийиши нәтиҗисидә, бу хил паалийәт мәзмунлириму бейимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.