Pirézidént donald tramp xitaygha qoyidighan tamozhna béjini kéchiktürmekchi bolghan

Amérika pirézidénti donald tramp saylam mezgilide xitay malliridin 60 pirsent baj alidighanliqini élan qilghan bolsimu, wezipige olturghandin kéyin bu bajni élishni tuyuqsiz kéchiktüridighan bolup qalghan.

“Ruytérs agéntliqi” ning 21-yanwar bergen xewiride qeyt qilinishiche, pirézidént donald tramp aqsaraygha qayta kirgen birinchi küni xitaygha tamozhna béji qoyushni tosattin arqigha sürgen hemde xitayni birdinbir tehdit dégen geplerni qilmighan. Halbuki, u wezipige olturush murasimidin kéyin qilghan sözidimu xitayni tüzük tilgha almighan. Bu hal amérika yéngi hökümitining xitay bilen toqunushmay, belki uning bilen söhbetlishish yolini tallighanliqidin dérek béridu dep qaralmaqta.

Xitay ilgiri amérikaning soda jéngidiki reqibi dep qaralghan bolup, pirézidént tramp ilgiri qilghan sözide, tamozhna béji arqiliq xitayni cheklep, amérikani téximu bay qilidighanliqini tekitlep kelgen. Xitay bolsa, soda jéngide her ikki terepning ziyan tartidighanliqini bildürüp, téximu köp mallirini amérikagha kirgüzüshke urunup kelgenidi. Nöwette pirézidént trampning xitaygha derhal tamozhna béji qoymasliqi, uning xitay bilen qayta söhbetlishish éhtimalini küchlendürmekte iken.

Xewerde déyilishiche, pirézidént tramp yene xitayning tik-tok ep détalini chekleshnimu keynige sürgen bolup, amérika shirketlirige tik-tokning 50 pirsent péyini élish, uni saqlap qélish teklipi bergen hemde tik-tokning kelgüside nechche yüz milyard dollarliq bazar qimmiti yaritidighanliqini éytqan.

Siyasiy analizchilarning bildürüshiche, 2020-yildiki soda kélishimi we ilgiri hel qilinmighan mesililer amérika bilen xitayning nöwettiki munasiwiti we söhbitige xiris élip kélidiken؛ shundaqtimu tramp 2-nöwetlik wezipe öteshni bashlighan bu mezgilde, ikki terep özlirining nishani we menpe'etige paydiliq yéngi pilan, yéngi kélishim tüzüshke éhtiyajliq bolidiken.