Сиясий мутәхәссисләр америкаға хитайниң иқтисадини чөктүрүш тәклипи бәргән

Америка вә дунядики көплигән дөләтләр хитайниң русийәгә ярдәм беришигә қарши чиқиватқан бир мәзгилдә, америкадики сиясий мутәхәссисләр американи хитайниң иқтисадини дәрһал чәкләш тәдбири қоллинишқа үндигән.

“фокс иқтисад хәвәрлири” ториниң бу һәқтә бәргән хәвиридә ейтилишичә, америка “атлас оргини” ниң қурғучиси җонатан вард (Jonathan Ward) “фокс теливизийәси” ниң зияритини қобул қилғанда, коммунист хитай һөкүмитигә һәрикәт қоллинидиған вақитниң кәлгәнликини билдүрүп мундақ дегән: “хитай бизгә қарши тәшвиқат һуҗуми қозғаватиду, русийәгә ярдәм қиливатиду, демәк, хитайда америкаға қарита чоңқур дүшмәнлик бар. Әмди бизниң һәрикәт усулимизни өзгәртидиған вақтимиз кәлди. Биз уларниң үстүнлүкини аҗизлитишимиз, иқтисадини чөктүрүшимиз керәк. Йәни ғәрбниң техникиси, капитали вә базирини хитайға кириштин чәклишимиз керәк”.

Хәвәрдә көрситилишичә, 3-айниң 3-күни америка президенти җов байден германийә баш миниситири олаф шултз билән көрүшкәндә коммунист хитайниң дуняви тәһдити вә русийәгә қорал ярдими қилмақчи болуватқанлиқи һәққидә сөһбәтләшкән.

Җонатан вардниң қаришичә, хитайниң русийәгә әҗәллик қораллар ярдими бәрмәкчи болуши, хәлқарадики сиясий оюнни өзгәртиду. Демәкки, хитай бу урушқа иқтисад, дипломатийә вә тәшвиқат җәһәттинла әмәс, һәрбий җәһәттинму қатнишиду. Хитайниң истратегийәси дуня иқтисадини өзигә бағливелиш болуп, америка билән униң иттипақдашлири дуняниң иқтисадий риқабитидә хитайни чоқум мәғлуб қилиши керәк. Алди билән, америка вол-стрет кочиси вә америка ширкәтлири хитайдин пул тепиштин ваз кечиши, хитайға мәбләғ қилип салған 2 тирилйон долларни қандақ бир тәрәп қилишни ойлишиши керәк.