Siyasiy mutexessisler amérikagha xitayning iqtisadini chöktürüsh teklipi bergen

Muxbirimiz jewlan
2023.03.08

Amérika we dunyadiki köpligen döletler xitayning rusiyege yardem bérishige qarshi chiqiwatqan bir mezgilde, amérikadiki siyasiy mutexessisler amérikani xitayning iqtisadini derhal cheklesh tedbiri qollinishqa ündigen.

“Foks iqtisad xewerliri” torining bu heqte bergen xewiride éytilishiche, amérika “Atlas orgini” ning qurghuchisi jonatan ward (Jonathan Ward) “Foks téliwiziyesi” ning ziyaritini qobul qilghanda, kommunist xitay hökümitige heriket qollinidighan waqitning kelgenlikini bildürüp mundaq dégen: “Xitay bizge qarshi teshwiqat hujumi qozghawatidu, rusiyege yardem qiliwatidu, démek, xitayda amérikagha qarita chongqur düshmenlik bar. Emdi bizning heriket usulimizni özgertidighan waqtimiz keldi. Biz ularning üstünlükini ajizlitishimiz, iqtisadini chöktürüshimiz kérek. Yeni gherbning téxnikisi, kapitali we bazirini xitaygha kirishtin cheklishimiz kérek”.

Xewerde körsitilishiche, 3-ayning 3-küni amérika prézidénti jow baydén gérmaniye bash minisitiri olaf shultz bilen körüshkende kommunist xitayning dunyawi tehditi we rusiyege qoral yardimi qilmaqchi boluwatqanliqi heqqide söhbetleshken.

Jonatan wardning qarishiche, xitayning rusiyege ejellik qorallar yardimi bermekchi bolushi, xelq'aradiki siyasiy oyunni özgertidu. Démekki, xitay bu urushqa iqtisad, diplomatiye we teshwiqat jehettinla emes, herbiy jehettinmu qatnishidu. Xitayning istratégiyesi dunya iqtisadini özige baghliwélish bolup, amérika bilen uning ittipaqdashliri dunyaning iqtisadiy riqabitide xitayni choqum meghlub qilishi kérek. Aldi bilen, amérika wol-strét kochisi we amérika shirketliri xitaydin pul tépishtin waz kéchishi, xitaygha meblegh qilip salghan 2 tirilyon dollarni qandaq bir terep qilishni oylishishi kérek.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.