Американиң муавин ташқий ишлар министири: “хитай әгәр русийәниң украинадики урушини қоллиса, қандақ ақивәткә учрайдиғанлиқини билиши керәк”

Мухбиримиз ирадә
2022-04-07
Share

Америкиниң муавин ташқий ишлар минстири венди шерман (Wendy Sherman) украинаға таҗавуз қилғанлиқи үчүн русийәгә йүргүзүлгән җаза тәдбирлири хитайға обдан савақ болуши керәк, дегән.

Ройтерс агентлиқиниң хәвәр қилишичә, венди шерман бу сөзләрни 6-април күни америка авам палатаси ташқий ишлар комитетиниң испат аңлаш йиғинида қилған. У мундақ дегән: “американиң иттипақдашлири вә шериклири билән биллә русийә президенти виладимир путинға, русийә иқтисадиға вә сиясий тәсиргә игә сода зәрдарлириға қарши қойған мас қәдәмлик җазалири вә експорт контроллуқи хитай рәһбири ши җинпиңға дәрс болуши керәк. Мениңчә, ши җинпиң путинни һәр қандақ маддий ярдәм билән тәминлигән тәқдирдә, немә ишларниң йүз беридиғанлиқини хели обдан чүшиниду.”

У йәнә бейҗиңниң тәйвәнни ишғал қилиш еһтималлиқиниму тилға елип: “бейҗиң ғәрбниң украинани ортақ қоллиғанлиқидин тоғра савақларни еливелиши керәк, хитайниң демократик тәйвән арилини зорлуқ билән ишғал қилмақчи болған һәрқандақ шәкилдики урунушини һәргиз қобул қилғили болмайду. Биз хитайниң бундақ урунушлириниң ялғуз американиңла әмәс, бәлки хәлқара җәмийәтниңму бирдәк қаршилиқиға учрайдиғанлиқини көрүп йетишини үмид қилимиз,” дегән.

Йеқинда хәлқаралиқ ахбаратларда елан қилинған хәвәрләрдә, русийәниң украинаға таҗавуз қилғандин кейин хитайдин қорал-ярағ ярдәм қилишни сориғанлиқи ашкариланған иди. Хитай бу хәвәрниң растлиқини рәт қилған. Бирақ америка хитайни қаттиқ аһландуруп, әгәр хитайниң русийәни һәрқандақ һәрбий әслиһә билән тәминлигәнлики ашкариланса, буниң ақивитиниң еғир болидиғанлиқини билдүргән.

Америка президенти җов байден 3-айда хитай дөләт рәиси ши җинпиң билән син арқилиқ көрүшкәндиму ши җинпиңни бу һәқтә бивастә агаһландурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт