Блинкен бейҗиңда әгәр хитай русийәгә ярдәм беришни тохтатмиса, вашингтонниң тәдбир қоллинидиғанлиқини агаһландурди

Вашингтондин мухбиримиз әркин тәйярлиди
2024.04.26

Америка ташқи ишлар министири антони блинкен 26-апрел хитай зияритиниң ахирқи күни бейҗиңда ахбарат йиғини өткүзүп, әгәр хитай русийәниң украина урушиға ярдәм беришни тохтатмиса, вашингтонниң хитайға қарши тәдбир қоллинидиғанлиқини агаһландурған. Блинкен вашингтонниң конкрет қандақ тәдбир қоллинидиғанлиқини ейтмиған болсиму, лекин америка таратқулири илгири байдин һөкүмитиниң хитай банкилириға җаза йүргүзүши мумкинликини билдүргән.

Блинкен 26-апрел американиң бейҗиңда турушлуқ әлчиханисида өткүзгән ахбарат йиғинида, хитайниң явропа бихәтәрлики 2-дуня урушидин бери дуч кәлгән “әң чоң тәһдитиниң улғийишиға ярдәм қиливатқанлиқи” ни ениқ көрсәткәнликини билдүргән. Лекин блинкен бәзи саһәләрдә илгириләш һасил қилинғанлиқи, болупму зәһәрлик дора фәнтанелниң америкаға киришини тосушта бейҗиңниң тиришчанлиқ көрсәтмәкчи болғанлиқини махтиған.

Блинкенниң хитай зиярити америка ташқи ишлар министирлиқи йиллиқ кишилик һоқуқ доклатини елан қилип, хитайниң уйғурларға ирқий қирғинчилиқ қилиши давамлишиватқанлиқини җакарлиғандин кейин елип берилған. Нөвәттә, блинкенниң зиярәттә “уйғур ирқий қирғинчилиқи” мәсилисини оттуриға қойған-қоймиғанлиқи мәлум әмәс. Лекин BBC ниң билдүрүшичә, ши җинпиң 26-апрел блинкен билән хәлқ сарийида көрүшкәндә, әгәр америка “хитайниң тәрәққиятиға иҗабий позитсийәдә болса, мунасивәтләрниң һәқиқий рәвиштә муқимлишип, яхшилинидиғанлиқи вә илгириләйдиғанлиқи” ни ейтқан. Әмма блинкен BBC ға хитай вә униң бәзи ширкәтлири русийәни “һалқилиқ буюмлар” билән тәминләшни тохтатқандила, америка вә явропаниң хитай билән болған “яхши мунасивити” ниң йоли ечилидиғанлиқини ейтқан. Блинкен мундақ дегән: “биз буниңға четишлиқ хитай орунлириға тәдбир қолландуқ, әмма мән бүгүн йәнила әгәр хитай һәрикәткә өтмисә, бизниң йәнә тәдбир қоллинидиғанлиқимизни ениқ қәйт қилдим”.

Блинкен бу қетим америка билән хитайниң юқири техника, җәнубий деңиз, тәйвән боғузи қатарлиқ мәсилиләрдики ихтилапи кәскинлишип кәткән бир вақитта хитайда зиярәттә болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.