Blinkén béyjingda eger xitay rusiyege yardem bérishni toxtatmisa, washin'gtonning tedbir qollinidighanliqini agahlandurdi

Washin'gtondin muxbirimiz erkin teyyarlidi
2024.04.26

Amérika tashqi ishlar ministiri antoni blinkén 26-aprél xitay ziyaritining axirqi küni béyjingda axbarat yighini ötküzüp, eger xitay rusiyening ukra'ina urushigha yardem bérishni toxtatmisa, washin'gtonning xitaygha qarshi tedbir qollinidighanliqini agahlandurghan. Blinkén washin'gtonning konkrét qandaq tedbir qollinidighanliqini éytmighan bolsimu, lékin amérika taratquliri ilgiri baydin hökümitining xitay bankilirigha jaza yürgüzüshi mumkinlikini bildürgen.

Blinkén 26-aprél amérikaning béyjingda turushluq elchixanisida ötküzgen axbarat yighinida, xitayning yawropa bixeterliki 2-dunya urushidin béri duch kelgen “Eng chong tehditining ulghiyishigha yardem qiliwatqanliqi” ni éniq körsetkenlikini bildürgen. Lékin blinkén bezi sahelerde ilgirilesh hasil qilin'ghanliqi, bolupmu zeherlik dora fentanélning amérikagha kirishini tosushta béyjingning tirishchanliq körsetmekchi bolghanliqini maxtighan.

Blinkénning xitay ziyariti amérika tashqi ishlar ministirliqi yilliq kishilik hoquq doklatini élan qilip, xitayning Uyghurlargha irqiy qirghinchiliq qilishi dawamlishiwatqanliqini jakarlighandin kéyin élip bérilghan. Nöwette, blinkénning ziyarette “Uyghur irqiy qirghinchiliqi” mesilisini otturigha qoyghan-qoymighanliqi melum emes. Lékin BBC ning bildürüshiche, shi jinping 26-aprél blinkén bilen xelq sariyida körüshkende, eger amérika “Xitayning tereqqiyatigha ijabiy pozitsiyede bolsa, munasiwetlerning heqiqiy rewishte muqimliship, yaxshilinidighanliqi we ilgirileydighanliqi” ni éytqan. Emma blinkén BBC gha xitay we uning bezi shirketliri rusiyeni “Halqiliq buyumlar” bilen teminleshni toxtatqandila, amérika we yawropaning xitay bilen bolghan “Yaxshi munasiwiti” ning yoli échilidighanliqini éytqan. Blinkén mundaq dégen: “Biz buninggha chétishliq xitay orunlirigha tedbir qollanduq, emma men bügün yenila eger xitay heriketke ötmise, bizning yene tedbir qollinidighanliqimizni éniq qeyt qildim”.

Blinkén bu qétim amérika bilen xitayning yuqiri téxnika, jenubiy déngiz, teywen boghuzi qatarliq mesililerdiki ixtilapi keskinliship ketken bir waqitta xitayda ziyarette bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.