Блинкенниң хитай сиясити тоғрисидики нутқида хитай американиң асаслиқ рәқиби дейилгән

Мухбиримиз әркин
2022-05-06
Share

Пүтүн дуняниң диққити русийә-украина урушиға мәркәзләшкән бир вақитта, байден һөкүмитиниң русийәни әмәс, хитайни американиң асаслиқ рәқиби, дәп қарайдиғанлиқи илгири сүрүлди. Америка ташқи ишлар министири антони блинкен әсли 5-май күни нутуқ елан қилип, американиң хитай сияситини шәрһлимәкчи болған. Бирақ униң крона вируси билән юқумлинип қелиши сәвәблик униң нутқи кейингә кечиктүрүлгәниди. “вол стерет журнили” гезитиниң хәвәр қилишичә, улар блинкенниң нутуқиниң мәзмунидин хәвәр тапқан болуп, униң хитайни американиң асаслиқ рәқиби, дәп елан қилидиғанлиқини билдүргән.

“вол стерет журнили” гезитиниң хәвиридә ейтилишичә, һөкүмәткә мәслиһәт беридиған ташқи сиясәт мутәхәссислири блинкенниң нутқи ақсарайниң ‍өткән йили оттуриға қойған сияситидин бәк пәрқлинип кәтмәйдиғанлиқи, униңму иттипақдаш дөләтләр билән һәмкарлишип, хитай билән тиркишиш вә риқабәтлишишни, шуниң билән бир вақитта буниң дүшмәнлишишкә айлинип кетиштин сақлинишни тәкитләйдиғанлиқини билдүргән. Хәвәрдә, блинкенниң нутқи русийә украинаға таҗавуз қилип, америка вә униң иттипақдашлириниң хитайға болған диққитини чечивәткән, москва билән бейҗиңниң хирисни бирла вақитта қандақ бир тәрәп қилиш мәсилиси муназирә қозғиған бир вақитта елан қилинидиғанлиқи тәкитләнгән.

“вол стерет журнили” ниң ейтишичә, бәзи мутәхәссисләр “блинкенниң бу нутуқ арқилиқ русийә билән хитай пәйда қилған хирисни ‍өзара бағлап, уларниң мәвҗут йәршари тәртипигә болған хәтиригә қарита һәмкарлиқни тәкитлиши мүмкинликини ейтқан. Мәлум болушичә, блинкенниң нутқини җумһурийәтчиләр партийәсидин болған авам палата әзаси анди бар( Andy Barr )сунған “ши җинпиңниң мудахилә вә бузғунчилиқ һәрикити қанун лайиһәси” йеқинда авам палатасида мақулланғандин кейинла елан қилинидикән. Буниңда ши җинпиңниң нами тунҗи қетим бир америка қануниниң исмида тилға елинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт