Blinkénning xitay siyasiti toghrisidiki nutqida xitay amérikaning asasliq reqibi déyilgen

Pütün dunyaning diqqiti rusiye-ukra'ina urushigha merkezleshken bir waqitta, baydén hökümitining rusiyeni emes, xitayni amérikaning asasliq reqibi, dep qaraydighanliqi ilgiri sürüldi. Amérika tashqi ishlar ministiri antoni blinkén esli 5-may küni nutuq élan qilip, amérikaning xitay siyasitini sherhlimekchi bolghan. Biraq uning krona wirusi bilen yuqumlinip qélishi seweblik uning nutqi kéyin'ge kéchiktürülgenidi. “Wol stérét zhurnili” gézitining xewer qilishiche, ular blinkénning nutuqining mezmunidin xewer tapqan bolup, uning xitayni amérikaning asasliq reqibi, dep élan qilidighanliqini bildürgen.

“Wol stérét zhurnili” gézitining xewiride éytilishiche, hökümetke meslihet béridighan tashqi siyaset mutexessisliri blinkénning nutqi aqsarayning ‍ötken yili otturigha qoyghan siyasitidin bek perqlinip ketmeydighanliqi, uningmu ittipaqdash döletler bilen hemkarliship, xitay bilen tirkishish we riqabetlishishni, shuning bilen bir waqitta buning düshmenlishishke aylinip kétishtin saqlinishni tekitleydighanliqini bildürgen. Xewerde, blinkénning nutqi rusiye ukra'inagha tajawuz qilip, amérika we uning ittipaqdashlirining xitaygha bolghan diqqitini chéchiwetken, moskwa bilen béyjingning xirisni birla waqitta qandaq bir terep qilish mesilisi munazire qozghighan bir waqitta élan qilinidighanliqi tekitlen'gen.

“Wol stérét zhurnili” ning éytishiche, bezi mutexessisler “Blinkénning bu nutuq arqiliq rusiye bilen xitay peyda qilghan xirisni ‍öz'ara baghlap, ularning mewjut yershari tertipige bolghan xetirige qarita hemkarliqni tekitlishi mümkinlikini éytqan. Melum bolushiche, blinkénning nutqini jumhuriyetchiler partiyesidin bolghan awam palata ezasi andi bar( Andy Barr )sun'ghan “Shi jinpingning mudaxile we buzghunchiliq herikiti qanun layihesi” yéqinda awam palatasida maqullan'ghandin kéyinla élan qilinidiken. Buningda shi jinpingning nami tunji qétim bir amérika qanunining ismida tilgha élin'ghan.