Xitay amérika jumhuriyetchiler partiyisining partiye programmisidiki özlirige qaritilghan eyibleshlerge naraziliq bildürdi

Roytérs agéntliqining xewer qilishiche, amérikidiki jumhuriyetchiler partiyisi düshenbe küni qobul qilghan partiye programmisining xitaygha a'it qismida xitayning “Tibet we shinjangda medeniyet qirghinchiliqi ”élip bériwatqanliqini bildürgen. Uningda yene, xitayning jenubiy junggo déngizida igilik hoquqi barliqini ilgiri sürüshi “Bimenilik ” dep bahalinish bilen birge, amérikining teywen'ge qoral sétip bérishke alaqidar siyasetliride ching turushi kérekliki tekitlen'gen.

Buning bilen peyshenbe küni, xitay tashqi ishlar ministirliqi bayanat élan qilip, amérika jumhuriyetchiler partiyisige naraziliq bildürdi. Ular peyshenbe küni shinxu'a agéntliqining in'glizche xewerler bétide élan qilghan bayanatida “Jumhuriyetchiler partiyisi özining partiye programmisida xitayning teywen, tibet mesililiri hem shundaqla jenubiy junggo déngiz mesilisige qarita asasiy yoq eyibleshlerni otturigha qoyghan. Bu junggoning ichki ishlirigha arilashqanliq hésablinidu” dégen.

Xitay terep bayanatida yene, amérikidiki barliq partiyilerni xitayning tereqqiyatigha obyéktip halda, toghra baha bérishke chaqirghan.

Amérika jumhuriyetchiler partiyisidin prézidéntliqqa namzat bolghan donald trampmu öz nutuqlirida köp qétim xitayni eyiblep, amérika-xitay iqtisadiy munasiwetlirining qaytidin közdin kechürülüshi kéreklikini éytqan idi.