Америка дөләт хәвпсизлик мәслиһәтчиси сузан райс хитайни зиярәт қилиду

Ақсарай җүмә күни америка президенти обаманиң дөләт хәвпсизлик мәслиһәтчиси сузан райсниң 24‏-июлдин 27-июлға қәдәр хитайни зиярәт қилидиғанлиқини елан қилди.

Сузан райс хитайни хитай билән америкиниң җәнубий деңиз мәсилисидики пикир ихтилапи күчәйгән, хәлқара сот хитайниң җәнубий деңиздики игилик һоқуқ тәлипини “асассиз” дәп елан қилған мәзгилдә зиярәт қилиду.

Ақсарайниң баянатида көрситишичә, сузан райс бу сәпиридә хитай дөләт комиссари яң җйечини өз ичигә алған юқири дәриҗилик хитай әмәлдарлири билән көрүшүп, президент обаманиң бу йил 9‏-айда хитайға қилидиған зияритидә музакирә қилидиған район вә йәр шари характерлик мәсилиләр һәққидә өз-ара пикир алмаштуридикән.

Ақсарай баянатида йәнә, сузан райисниң шаңхәйни зиярәт қилидиғанлиқини, шаңхәйдә “пуқралар билән хусуси көрүшидиғанлиқи” ни, сода саһәси билән “хитайдики америка сода карханилириниң шараити” ни сөзлишидиғанлиқини билдүргән.

Америка дөләт хәвпсизлик комитетиниң баянатчиси нед прайсниң қәйт қилишичә, сузан райис хитайда америкиниң хитай билән әмәлий һәмкарлиқ нийити, униң билән болған пикир ихтилаплирини қандақ бир тәрәп қилиш қатарлиқ мәсилиләрдики мәйданини тәкитләп өтидикән.

Хәлқара сот 12‏-июл җәнубий деңиз мәсилисидә һөкүм чиқарған болсиму, әмма хитай өзиниң бу мәсилидики бурунқи мәйданини тәкитләп, хәлқара сотниң қарариға әмәл қилмайдиғанлиқини җакарлиған иди.