Uyghur aptonom rayonluq xelq qurultiyining amérika hökümitini eyiblishi diqqet qozghidi

Xitay bashqurushidiki “Shinxu'a tori” ning 23-awghusttiki xewiride éytilishiche, shu küni Uyghur aptonom rayonluq xelq qurultiyi 35-nöwetlik mudirlar yighini chaqirghan. Yighinda “Sh u a r xelq qurultiyi da'imiy komitétining amérika hökümitining shinjang heqqidiki jaza tedbirlirige qet'iy qarshi turush” témisidiki qarar layihesi maqullan'ghan.

Xewerde éytilishiche, bu qétimqi yighinda xelq qurultiyining mudiri zumret obul we bashqa mes'ullardin toxti yaqup, dilshat qidirxan, memtimin qadir, mutellip rozi qatarliqlar aldigha chiqirip qoyulghan bolup, shu arqiliq bu qararning Uyghurlargha wekillik qilidighanliqi ishare qilin'ghan.

Xewerde bu heqtiki qararning tepsiliy mezmuni heqqide melumatlar bérilmigen bolsimu, emma uning amérika hökümiti Uyghur qirghinchiliqi we mejburiy emgek mesilisi tüpeylidin xitay emeldarlirigha élan qilghan bir qatar jazalash tedbirlirige qarshi turush mezmunida ikenlikini tesewwur qilish mumkin. Amérika hökümiti bu xil jaza tedbirliri qatarida élan qilghan “Uyghur mejburiy emgikining aldini élish qanuni” xitayning tashqi éksportigha mu'eyyen derijide zerbe bergen bolup, xitay hökümitining emdilikte mushundaq bir qararni élishi bu xil jaza tedbirlirining belgilik roli boluwatqanliqini körsitip béridu, dep qaralmaqta.

Xitay hökümiti yéqinqi mezgillerde türlük teshwiqat wasitiliri ariliq özlirining qirghinchiliq jinayetlirini yépishqa urunup kéliwatqan bolup, Uyghur aptonom rayonluq xelq qurultiyining bu qétimqi yéngi qararimu shu xil urunushlarning biri qatarida her sahening küchlük diqqitini qozghimaqta.