Американиң хитайда турушлуқ әлчи намзати николас бурнс хитай һәққидә кәскин сөзләрни қилған

Мухбиримиз ирадә
2021-10-21
Share

Америка президенти җов байден тәрипидин американиң хитайда турушлуқ баш әлчиликигә намзат көрситилгән николас бурнс 20-өктәбир күни кеңәш палатасида өткүзүлгән испат аңлаш йиғинида хитай һәққидә кәскин сөзләрни қилған. У "хитайниң уйғурларға қиливатқан ирқий қирғинчилиқи чоқум тохтитилиши керәк" дегән.

Бурнис йиғиндики сөзидә хитайни американиң "әң хәтәрлик риқабәтчиси" дәп атап, американиң чоқум явропадики шерик дөләтлири билән һәмкарлишип, хитайға иқтисадий җәһәттин тақабил туруши керәкликини билдүргән.

У хитайниң кишилик һоқуқ хатириси һәққидә тохталғанда мунуларни дегән: "хитайниң шинҗаңда йүргүзүватқан ирқий қирғинчилиқи, тибәттики дәпсәндичикликлири, хоңкоңниң аптономийәси вә әркинликигә бузғунчилиқ қилиши һәмдә тәйвәнгә қаритиватқан зомигәрлики чоқум тохтитилиши керәк."

Испат аңлаш йиғинида у йәнә американиң тәйвән демократийәсини қоғдиши, корона вирусиниң мәнбәсини тәкшүрүши, хитайниң ядро паалийәтлирини тәкшүрүши керәкликини әскәрткән. У һазирқи дәврдики соғуқ урушниң иқтисад вә пән-техника арқилиқ болидиғанлиқини әскәртип, американиң чоқум шериклири билән бирликтә хитайға қарши иқтисадий вә юқири техникилиқ үстүнлүк шәкилләндүрүши керәкликини баян қилған.

Мәлум болушичә, бу йил 65 яшқа киргән николас бурнс пишқәдәм депломат болуп, у илгири американиң шималий атлантик әһди тәшкилатида турушлуқ әлчиси болған икән. Нөвәттә бурнисниң америка дөләт мәҗлисидики һәр икки партийәдин болған мәҗлис әзалириниң қоллишиға еришидиғанлиқи мөлчәрләнмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт