Америка авам палата әзаси америка университетлирида хитайниң тәсирини йоқитиш пиланини тонуштурған

Америка авам палатасиниң җумһурийәтчиләр партийәсидин болған әзаси майк галлагер хитайниң америка университетлиридики тәсирини азайтиш һәққидә 5 қисимлиқ пилан оттуриға қойған.

Америкадики “университет хәвәрлири” ториниң хәвиридин мәлум болушичә, майк галлагер америка университетлирини хитай билән америка оттурисидики “йеңи соғуқ урушниң әң муһим җәң мәйданлириниң бири” дегән. У вискансон шитатлиқ мәҗлистә университетлар вә техника саһәси һәққидики гуваһлиқ йиғинида қилған сөзидә америка университетлириниң хитай билән һәмкарлиқиниң хәтәрлик дәриҗигә йәткәнликини әскәртип, мунуларни дегән:

“нөвәттики вәзийәт сиҗил әмәс-биздәк улуғ бир дөләт бизниң әң чоң дүшминимизниң тәсиридин қутулуши керәк. Америка университетлири вә карханилири өз дөлити тәрәптә турамду яки бизниң турмуш усулимизни бузушни нийәт қилған, ирқий қирғинчилиқ билән шуғуллиниватқан бир коммунист һакимийәт тәрәптә турамду? буниңға қарар бериши керәк. Биз һәргиз уларға охшаш бир хил идийәни алға сүрүш вә юқири техникалиқ назарәт йолиға маңмаслиқимиз керәк”.

У университит даирилириниң хитай салған мәбләғқә тайинип қеливатқанлиқини, шуңа уларниң қарарлириниңму бу һөкүмәтниң тәсиригә учраватқанлиқини ейтип, мундақ дегән:

“биз дөләт миқясида һәр икки партийә әзалириниң қетилиши билән куңзи иниститутлирини чәклидуқ. Әмма бәзи университетлар федерал чәкләш буйруқидин қутулуш үчүн дәрһал мәктәплиридики куңзи институтлириниң исимлирини өзгәртипла паалийәтлирини давам қилдурмақта. Бу университетлар йәнә һәрхил намлар астида хитай коммунистлиридин пул вә совғат алмақта.”

Дөләт мәҗлис әзаси майк галлагер сөзидә америка унверситетилиридики мана мушу хил вәзийәткә хатимә бериш үчүн чоқум алди билән мәктәпләрниң фонд мәсилисини һәл қилиш, йеңи қанун-низамларни бәлгиләш, хитай оқуғучилар вә уларниң назук тәтқиқат түрлиригә қатнишишини тәңшәш қатарлиқ 5 қисимлиқ пиланни тонуштуруп өткән.

У шу күндики сөзидә йәнә хитайниң уйғурларға қиливатқан ирқий қирғинчилиқи һәққидиму тохтилип: “хитайни бу адәм ишәнгүсиз һәрикәттин тохтитишниң йоли униң иқтисадий мәнбәсини үзүштур. Америка алий мәктәплири хитай билән һәмкарлиқини тохтитиши; дөләтлик, шитатлиқ вә йәрлик пенсийә фондлирини хитай ширкәтлиридин чекиндүрүп чиқиши керәк,” дегән.