Америка-хитай рәһбәрлириниң сан-франсиско сөһбитиниң нәтиҗиси охшимиған инкасларни қозғиди

Вашингтондин мухбиримиз әркин тәйярлиди
2023.11.17

Америка президенти җов байденниң 15-ноябир күни хитай рәиси ши җинпиң билән болған сөһбитиниң нәтиҗисигә қарита охшимиған инкаслар оттуриға қоюлмақта. Болупму җумһурийәтчиләр партийәсидикиләр президент байденни бейҗиң билән “әһмийәтсиз алақә” қуруш бәдилигә униңға тез пүкүш билән тәнқид қилмақта. Мәлум болушичә, икки рәһбәр бу қетимлиқ учришишта һәрбий алақини қайта әслигә кәлтүрүш, сүний әқил технологийәси пәйда қилған хәвп-хәтәрни бирликтә контрол қилиш, сүний әпйүн-фәнтанилға қарши турушта һәмкарлишиш қатарлиқ конкрет мәсилиләрдә пикир һасил бирлики һасил қилған. Президент байден сөһбәттин кейин өткүзгән ахбарат йиғинида ши җинпиң билән болған сөһбәтни муәййәнләштүрүп, икки тәрәпниң “өткән бир қанчә айлиқ юқири дәриҗилик дипломатик учришишлири асасида, бәзи муһим илгириләшләргә еришкәнлики” ни билдүргән.

Лекин җумһурийәтчиләр учришишниң америка-хитай мунасивәтлиридики һалқилиқ мәсилиләрниң йәнила һәл болмиғанлиқини көрситип, икки тәрәп һасил қилған һәмкарлиқниң әмәлий әһмийити барлиқиға соал қоюшмақта. Америка авам палатаси ташқи ишлар комитетиниң рәиси майк миккаул 16-сентәбир язма баянат елан қилип, байден һөкүмитиниң хитай компартийәси билән елип барған “биһудә учришишлири” дин үмидсизләнгәнликини ейтқан. Униң көрситишичә, байден һөкүмити бу қетимқи башлиқлар йиғини үчүн хитайға йол қоюп кәлгән. Болупму “һазир униңға техиму көп йол қоюп, униң кишилик һоқуқни дәпсәндә қилған бир органини тизимликтин чиқармақчи болған”.

Ройтерс агентлиқи 16-ноябир байден һөкүмитиниң “хитай әдлийә пәнлири институти” ни ембарго тизимликидин чиқармақчи болғанлиқини хәвәр қилған. Америка илгири бу органға уйғурларни бастурушқа қатнашқанлиқи сәвәбидин җаза йүргүзгән. Байден-ши сөһбити җумһурийәтчиләрниң тәнқидигә учрисиму, лекин авам вә кеңәш палатасидики демократларниң муәййәнләштүрүшигә еришкән. Мәлум болушичә, америка кеңәш палатаси ташқи мунасивәтләр комитетиниң рәиси бен кардин вә бу комитетниң 10 нәпәр демократик әзаси ортақ баянат елан қилип, җов байденниң ши җинпиң билән йүзтуранә көрүшкәнлики вә еришкән нәтиҗисини мәдһийәлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.