Amérika-xitay rehberlirining san-fransisko söhbitining netijisi oxshimighan inkaslarni qozghidi

Washin'gtondin muxbirimiz erkin teyyarlidi
2023.11.17

Amérika prézidénti jow baydénning 15-noyabir küni xitay re'isi shi jinping bilen bolghan söhbitining netijisige qarita oxshimighan inkaslar otturigha qoyulmaqta. Bolupmu jumhuriyetchiler partiyesidikiler prézidént baydénni béyjing bilen “Ehmiyetsiz alaqe” qurush bedilige uninggha téz püküsh bilen tenqid qilmaqta. Melum bolushiche, ikki rehber bu qétimliq uchrishishta herbiy alaqini qayta eslige keltürüsh, sün'iy eqil téxnologiyesi peyda qilghan xewp-xeterni birlikte kontrol qilish, sün'iy epyün-fentanilgha qarshi turushta hemkarlishish qatarliq konkrét mesililerde pikir hasil birliki hasil qilghan. Prézidént baydén söhbettin kéyin ötküzgen axbarat yighinida shi jinping bilen bolghan söhbetni mu'eyyenleshtürüp, ikki terepning “Ötken bir qanche ayliq yuqiri derijilik diplomatik uchrishishliri asasida, bezi muhim ilgirileshlerge érishkenliki” ni bildürgen.

Lékin jumhuriyetchiler uchrishishning amérika-xitay munasiwetliridiki halqiliq mesililerning yenila hel bolmighanliqini körsitip, ikki terep hasil qilghan hemkarliqning emeliy ehmiyiti barliqigha so'al qoyushmaqta. Amérika awam palatasi tashqi ishlar komitétining re'isi mayk mikka'ul 16-séntebir yazma bayanat élan qilip, baydén hökümitining xitay kompartiyesi bilen élip barghan “Bihude uchrishishliri” din ümidsizlen'genlikini éytqan. Uning körsitishiche, baydén hökümiti bu qétimqi bashliqlar yighini üchün xitaygha yol qoyup kelgen. Bolupmu “Hazir uninggha téximu köp yol qoyup, uning kishilik hoquqni depsende qilghan bir organini tizimliktin chiqarmaqchi bolghan”.

Roytérs agéntliqi 16-noyabir baydén hökümitining “Xitay edliye penliri instituti” ni émbargo tizimlikidin chiqarmaqchi bolghanliqini xewer qilghan. Amérika ilgiri bu organ'gha Uyghurlarni basturushqa qatnashqanliqi sewebidin jaza yürgüzgen. Baydén-shi söhbiti jumhuriyetchilerning tenqidige uchrisimu, lékin awam we kéngesh palatasidiki démokratlarning mu'eyyenleshtürüshige érishken. Melum bolushiche, amérika kéngesh palatasi tashqi munasiwetler komitétining re'isi bén kardin we bu komitétning 10 neper démokratik ezasi ortaq bayanat élan qilip, jow baydénning shi jinping bilen yüzturane körüshkenliki we érishken netijisini medhiyeligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.