Xitay tehditige taqabil turush üchün amérika gu'am arilida we awstraliyede herbiy baza quridiken

Muxbirimiz eziz
2021-12-01
Share

CNN Agéntliqining 1-dékabirdiki xewirige qarighanda amérika hökümiti barghanséri éghirlap méngiwatqan xitay tehditige taqabil turush üchün gu'am arili we awstraliyede herbiy baza qurush aldida turmaqta iken.

Xewerde éytilishiche, prézidént baydén bu yilning béshida amérika dölet mudapiye ministiri, général loyid astin'gha “Dunyawi weziyetni közitip chiqish” heqqide körsetme bergen iken. Yéqinda mezkur közitish xulasilinip, buningdiki bir muhim tedbir qatarida mushu ikki jayda herbiy baza qurush, shu arqiliq xitayning jenubiy xitay déngizi teweside barghanséri ewzeylewatqan herbiy ighwagerchilikige taqabil turush teklipi sunulghan. Aqsaray bolsa bu xulase we tewsiyeni testiqlaydighanliqini bildürgen. Aqsaraydiki yuquri derijilik herbiy emeldarlardin mara karlin bu heqte söz qilip: “Xitay hazir barghanséri zor tehditke aylanmaqta. Shunga bu jaylarda herbiy qurulushni kücheytish bekmu muhim” dégen.

Melum bolushiche, amérika bilen awstraliye, hindistan, yaponiye otturisiki ittipaqmu xitayning tinch okyan rayonidiki ighwagerchilikini chekleshni muhim nishanlarning biri qilghan bolup, bezi mutexesisler: “Amérika bilen xitay otturisidiki herbiy toqunush bashlansa u jenubiy xitay déngizida barliqqa kélidu,” dep qarimaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet