Amérika we xitay awiyamatkilirining tinch okyandiki pa'aliyiti diqqet qozghidi

“Heptilik xewerler” gézitining 16-awghusttiki xewiride éytilishiche, amérika tinch okyan flotidiki “Abraxam linkolin” namliq awiyamatka buyruq boyiche tinch okyanni késip ötüp, ottura sherqqe yol alghan. Bu “Rozwélt” namliq awiyamatkidin kéyinki ikkinchi awiyamatkining ottura sherqqe méngishi iken.

Xewerde éytilishiche, awiyamatka adette aldirap yolgha chiqirilmaydighan bolup, köpinche dölet xewpsizliki tashqi siyasitide melum özgirish bolghanda munasip rewishte yötkilidiken. Melum bolushiche, amérika déngiz armiyesining 11 awiyamatkisi bolup, buning altisi tinch okyan'gha orunlashqan. “Linkolin” namliq awiyamatka tinch okyanni késip ötüp bu rayondin ayrilghan künning etisi xitay déngiz armiyesining “Shendung” namliq ikkinchi awiyamatkisi bashqa üch urush paraxoti bilen filippin déngizida uchush meshqi qilghan hemde 13-awghust kechqurun jenubi déngizgha qaytqan. Emma xitayning “Fujyen” namliq üchinchi awiyamatkisi shangxey portidin chiqmighan bolup, téxi urush qilish iqtidarini toluq hazirlap bolmighan, dep qaralmaqta iken.

Nöwette weziyet analizchiliri xitay awiyamatkisining filippin déngizidiki uchush meshqini addiyghine manéwir, dep qarimighan. Siyasiy analizchi ryan chan (Ryan Chan) bu heqte toxtilip, “Xitay déngiz armiyesi bu arqiliq tinch okyandiki amérika tesirige xiris qilmaqchi” dégen. Emma déngiz armiyesi jehettiki melumatlar, xitay déngiz armiyesining amérika déngiz armiyesidin köp jehette arqida ikenlikini körsitidiken.